உள்ள வீட்டில் தண்ணியடிச்சுட்டு (மதுபோதை) அந்தச் சந்தியில் வந்து நின்றம். பொலிஸ்காரன் வரேக்க, உனக்கு தைரியம் இருந்தா அவன்ர துவக்கை எடுத்துச் சுடடா பார்ப்பம் என்று மச்சான் சொன்னான். பொலிஸ்காரன்ர துவக்கை எடுக்கேக்க தெரியாமல் சுடுபட்டுட்டுது” இவ்வாறு நல்லூர் துப்பாக்கிச் சூட்டுச் சம்பவத்துடன் தொடர்புடையதாக பொலிஸாரால் தேடப்பட்டு வந்த முதன்மைச் சந்தேகநபர், பொலிஸில் நேற்றுச் சரணடைந்து வழங்கிய வாக்குமூலத்தில் தெரிவித்தார்.
சந்தேகநபர் யாழ்ப்பாண நீதிவான் எஸ்.சதீஸ்தரனின் உத்தியோகபூர்வ இல்லத்தில் நேற்று மாலை முற்படுத்தப்பட்டார். அவரை எதிர்வரும் 8ஆம் திகதி வரையில் விளக்கமறியலில் வைக்க நீதிவான் உத்தரவிட்டார்.
நல்லூரில் கடந்த சனிக்கிழமை மாலை 5.15 மணியளவில் துப்பாக்கிச்சூட்டுச் சம்பவம் இடம்பெற்றிருந்தது. யாழ்ப்பாணம் மேல் நீதிமன்ற நீதிபதி மா.இளஞ்செழியனின் மெய்ப்பாதுகாவலரது பிஸ்டலை பறித்தே துப்பாக்கிச்சூடு நடத்தப்பட்டிருந்தது.
தன்னை இலக்கு நோக்கியதாக இந்தச் சம்பவம் இருக்கக் கூடும் என்று சந்தேகிப்பதாக நீதிபதி மா.இளஞ்செழியன் தெரிவித்திருந்தார். பொலிஸார் அதனை மறுத்திருந்தனர்.
சம்பவத்துடன் தொடர்புடைய சந்தேகத்தில் இருவர் அன்றிரவே கைது செய்யப்பட்டிருந்தனர்.
முக்கிய சந்தேகநபரைத் தேடி வருவதாகப் பொலிஸார் தெரிவித்திருந்தனர். அவர் வெளிமாவட்டத்துக்கு தப்பிச் சென்றிருந்ததாகவும், அவரைத் தேடி கிளிநொச்சி மற்றும் முல்லைத்தீவுக்கு சிறப்பு பொலிஸ் குழுக்கள் சென்றுள்ளதாகவும் பொலிஸ் தரப்புத் தகவல்கள் நேற்று முன்தினம் தெரிவித்திருந்தனர்.
இந்த நிலையில் திடீரென – யாருமே எதிர்பார்க்காத நிலையில், பொலிஸாரால் தேடப்பட்ட முதன்மைச் சந்தேகநபர் யாழ்ப்பாணம் பொலிஸ் நிலையத்தில் நேற்றுக் காலை 8.20 மணியளவில் சரணடைந்தார். அவரிடம் நேற்று மாலை 5 மணிவரை வாக்குமூலம் பெறப்பட்டது.
“துப்பாக்கிச்சூடு நடத்திய பின்னர் பிஸ்டலைக் காட்டி வீதியால் வந்தவரது ஸ்கூட்டரைப் பறித்தேன். ஸ்கூட்டரில், ஆடியபாதம் வீதி கல்வியன்காட்டுப் பகுதிக்குச் சென்று அங்கிருந்து அரியாலைக்குச் சென்றேன். அரியாலை பேச்சி அம்மன் கோயிலுக்குப் பின்னால் ஸ்கூட்டரைப் போட்டுவிட்டு திருநகர் பகுதியில் உள்ள பெரியம்மா வீட்டுக்குச் சென்றேன்.
அங்கு பெரியம்மாவிடம், “போதையில் பொலிஸூக்கு அடித்துப்போட்டன். பொலிஸ் என்னைத் தேடுது” என்று சொன்னேன். பெரியம்மா வீட்டிலேயே உடையை மாற்றி விட்டு, ஓட்டுமடம் பகுதியில் உள்ள கோம்பயன்மணல் சுடலையில் அன்றைய இரவைக் கழித்தேன்.
மறுநாள் பகல் நாவந்துறையில் உள்ள உறவினர் வீட்டில் நின்றேன். அன்றிரவு கொட்டடியில் உள்ள மாமாவின் வீட்டுக்குச் சென்றேன். நல்லூரில் நடந்த சம்பவத்தை மாமா அறிந்து வைத்திருக்க வேண்டும்.
ஏனெனில், என்னை அங்கு கண்டதும் மாமா உடனடியாக எனது அப்பாவுக்கு அலைபேசி அழைப்பை ஏற்படுத்தி நான் வந்ததைக் கூறினார்.
மாமா “என்னை பொலிஸில் சரணடையுமாறு கூறினார். அதன்படி மாமாவுடன் வந்து பொலிஸில் சரணடைந்தேன்” என்று சந்தேகநபர் வாக்குமூலம் வழங்கியதாகப் பொலிஸ் தரப்புத் தகவல்கள் தெரிவித்தன.
வாக்குமூலம் பெற்றுக் கொள்ளப்பட்ட பின்னர், திருநகரில் உள்ள சந்தேகநபரின் பெரியம்மா வீட்டுக்கு பொலிஸ் வாகனத்தில் கறுப்புத்துணியால் மூடிய நிலையில் சந்தேகநபர் அழைத்துச் செல்லப்பட்டார்.
துப்பாக்கிச் சூடு நடத்தும்போது அணிந்திருந்த உடைகள் உள்ளிட்ட சில பொருள்கள் மீட்கப்பட்டன.
பின்னர் அவர் யாழ்ப்பாணம் பொலிஸ் நிலையத்துக்கு அழைத்து வரப்பட்டார். அதனைத் தொடர்ந்து யாழ்ப்பாணம் நீதிவானின் உத்தியோகபூர்வ இல்லத்தில் சந்தேகநபர் முற்படுத்தப்பட்டார்.
சந்தேகநபர் யார்?
சந்தேகநபர், சிவராசா ஜெயந்தன் (வயது–39). இவர் 1995ஆம் ஆண்டிலிருந்து 1998ஆம் ஆண்டு வரையில் தமிழீழ விடுதலைப் புலிகள் அமைப்பின் ‘சைபர்’ படையணியில் இருந்துள்ளார்.
1998ஆம் ஆண்டு விடுதலைப் புலிகள் அமைப்பிலிருந்து விலகுவதற்கான கடிதம் கொடுத்துள்ளார்.
அமைப்பிலிருந்து இடையில் விலகுவதன் காரணமாக விடுதலைப் புலிகள் தண்டனை கொடுத்துள்ளனர்.
இரணைமடு முகாமில் சமையல் வேலை செய்யும் தண்டனை அவருக்கு வழங்கப்பட்டுள்ளது.
2000ஆம் ஆண்டு முழங்காவில் பகுதியில் வசித்துள்ளார்.
முழங்காவிலில், யாழ்ப்பாணம் மண்கும்பானைச் சேர்ந்த பெண்ணை திருமணம் முடித்துள்ளார். இவருக்கு 4 பிள்ளைகள் உள்ளனர்.
2002ஆம் ஆண்டு மண்கும்பானில் சந்தேகநபர் குடும்பத்துடன் குடியேறியுள்ளார். ஆரம்பத்தில் கூலி வேலைகள் செய்துள்ளார்.
பின்னர் ஐஸ் பழ வியாபாரத்தில் ஈடுபட்டுள்ளார். இதன்போது வேலணையில் மற்றொரு திருமணம் செய்துள்ளார். இவருக்கும் 4 பிள்ளைகள் பிறந்துள்ளனர்.
வேலணை பிரிவு 4ஆம் வட்டாரத்தில் தொடர்ந்து வசித்து வருகின்றார்.
யாழ்ப்பாணம் – குறிகாட்டுவான் பேருந்துச் சேவையில் சாரதியாக பணியாற்றி வருகின்றார்.
