புத்தளம், வென்னப்புவ பகுதியால் சென்று கொண்டிருந்த சிறைச்சாலை பஸ் ஒன்றின் மீது தாக்குதல் நடத்தப்பட்டுள்ள சம்பவம் தொடர்பில் பொலிஸார் விசாரணைகளை ஆரம்பித்துள்ளனர்.
அனுராதபுரத்திலிருந்து கொழும்பு நோக்கி சென்று கொண்டிருந்த சிறைச்சாலை பஸ் ஒன்றின் மீது நேற்று அதிகாலை வேளையில் வைக்கால பகுதியில் வைத்து தாக்குதல் நடத்தப்பட்டுள்ளது. நேற்று அதிகாலை மூன்று மணியளவில் இந்தச் சம்பவம் இடம்பெற்றுள்ளதாக பொலிஸார் தெரிவித்துள்ளனர்.
இந்த பஸ் வண்டி தாக்குதலுக்கு இலக்கானபோது அதனுள் வெலிக்கடை சிறைச்சாலையிலிருந்து நாடக குழுவொன்றை சேர்ந்த கைதிகள் 14 பேர் இருந்துள்ளனர். இவர்களை அனுராதபுரத்திலுள்ள விஹாரை ஒன்றுக்கு மல்லிகைப்பூ வழிபாட்டு நிகழ்வொன்றிற்காக அழைத்துச் சென்றுவிட்டு மீண்டும் வந்த போதே இந்த தாக்குதல் இடம்பெற்றுள்ளது.
இந்த சம்பவம் தொடர்பில் முன்னெடுக்கப்பட்ட விரிவான விசாரணைகளின் போது மோட்டார் சைக்கிளொன்றில் வந்த இனந்தெரியாத இருவர் இரண்டரை லீற்றர்கள் தண்ணீர் நிரப்பப்பட்ட போத்தலொன்றினால் பஸ்வண்டியின் மீது தாக்குதல் நடத்தியுள்ளதாக தெரியவந்துள்ளது.
எவ்வாறாயினும் நேற்றுவரையில் சம்பவத்துடன் தொடர்புடையவர்கள் எவரும் கைது செய்யப்பட்டிருக்கவில்லை. தாக்குதல் நடத்தப்பட்ட வேளையில் பஸ் வண்டியினுள் இருந்த கைதிகளுக்கு எந்தவித பாதிப்புக்களும் இல்லை என தெரிவிக்கப்படுகின்றது.
