இலங்கையில் பௌத்த மதத்துக்கு முன்னுரிமை வழங்கப்படும். ஏனைய மதங்களுக்குச் சம உரிமை வழங்கப்படும். இதனைச் செய்வதற்கு நாம் ஒருபோதும் பின்நிற்கப் போவதில்லை.
இவ்வாறு அரச தலைவர் மைத்திரிபால சிறிசேனவும், தலைமை அமைச்சர் ரணில் விக்கிரமசிங்கவும் தெரிவித்துள்ளனர்.
7ஆவது பன்னாட்டு பௌத்த மாநாடு அலரி மாளிகையில் நடைபெற்றது. இந்த நிகழ்வில் உரையாற்றுகையிலேயே இருவரும் மேற்கண்டவாறு கூறினர்.
அரச தலைவர் மைத்திரிபால, இந்த நாட்டில் சகல மதங்களும் இணைந்து சமமாக வாழக்கூடிய ஒரு சூழல் உருவாக்கப்பட வேண்டும்.
அதேபோல் பௌத்தம் அடையாளப்படுத்தப்பட்டு அதற்கமைய நாடு இயங்க வேண்டும் என்பதில் நாம் உறுதியாக உள்ளோம்.
நீண்ட காலப் போரை எதிர்கொண்ட நாடு என்ற வகையில் எமது நாட்டில் சமூக இன ஒற்றுமையைப் பலப்படுத்தி, ஒரு இணைந்த சமூகமாக முன்னோக்கிச் செல்ல, எதிர்கால சந்ததியினர் அமைதியாக வாழ வேண்டிய வகையில் பௌத்த கொள்கைக்கு அமைய நாம் செயற்பட வேண்டும் என்றார்.
தலைமை அமைச்சர் ரணில் விக்கிரமசிங்க, இலங்கையில் பௌத்தம் மிக நீண்டகால வரலாற்றைக் கொண்டுள்ளது. அசோகச் சக்கரவர்த்தி மூலமாக இலங்கையில் பௌத்தம் உருப்பெற்றதை அடுத்து மிக நீண்டகால வரலாற்றைத் தோற்றுவித்துள்ளது.
பௌத்தம் இலங்கையின் பிரதான மதமாக அடையாளப்படுத்தப்பட்டுள்ளது. அதில் மாற்றம் இல்லை. எப்போதும் பௌத்த மதத்துக்கே முன்னுரிமை வழங்கப்படும்.
அதே நிலையில் இலங்கையில் உள்ள ஏனைய சிறுபான்மை மக்களின் மதங்களுக்கும் அங்கீகாரம் வழங்கப்பட்டு வருகின்றது. தொடர்ந்தும் அதை நாம் பேணிப் பாதுகாப்போம்.
இந்த நாட்டில் பௌத்தம் பிரதான மதமாக உள்ள அதே நிலையில் ஏனைய மதங்களுக்கும் சம அந்தஸ்து வழங்கப்படும்.
நாட்டின் சமாதானமும் அமைதியும் அதிலேயே தங்கியுள்ளது. அமைதியாக மக்கள் வாழக்கூடிய வகையில் பௌத்த மதக் கொள்கைகளை நாட்டில் மேலும் பலப்படுத்தி சமாதானத்தை உருவாக்குவோம் என்றார்.
