உள்ளூராட்சி மன்றங்களுக்கான தேர்தல் நிறைவடைந்த பின்னர் நீண்டகால தேசியப் பிரச்சினைக்கு தீர்வு காணும் வகையில் புதிய அரசியலமைப்பு நிறைவேற்றப்பட்டு நடைமுறைப்படுத்தப்பட வேண்டும் என்று வலியுறுத்திய எதிர்க்கட்சித்தலைவரும்
தமிழ்த் தேசியக் கூட்டமைப்பின் தலைவருமான இரா.சம்பந்தன் அரசாங்கத்தின் தாமதங்கள் தமிழ் மற்றும் சிங்கள மக்கள் மத்தியிலுள்ள கடும் போக்காளர்கள் தமது செயற்பாடுகளை முன்னெடுத்துச் செல்ல உந்துசக்தியாக அமைவதாகவும் குறிப்பிட்டார்.
இலங்கைக்கான ஐரோப்பிய ஒன்றியத்தின் அரசியல் பிரிவுத் தலைவர் கொட்பிறிக்கும் தமிழ்த் தேசியக் கூட்டமைப்பின் தலைவரும் எதிர்க்கட்சித் தலைவருமான இரா.சம்பந்தனுக்குமிடையில் விசேட சந்திப்பொன்ற நேற்று செவ்வாய்க்கிழமை கொழும்பிலுள்ள எதிர்க்கட்சித் தலைவரின் அலுவலகத்தில் இடம்பெற்றது.
இச்சந்திப்பின்போது தமிழ் மக்களின் அன்றாடப் பிரச்சினைகள் தொடர்பில் ஐரோப்பிய தூதுவரைத் தெளிவுபடுத்திய சம்பந்தன்,
பயங்கரவாதத் தடைச் சட்டமானது நீக்கப்பட வேண்டியதொன்றாகும். இச்சட்டம் நீக்கப்படும் என்று இலங்கை அரசாங்கமானது சர்வதேச சமூகத்துக்கு வாக்குறுதி வழங்கியுள்ளது. இந்தச் சட்டத்தின் கீழ் கைதுசெய்யப்பட்டு தடுப்புக் காவலில் உள்ளவர்கள் விடுதலை செய்யப்படவேண்டும். இந்த விடயத்தில் இழுத்தடிப்புக்கள் இடம்பெறுவதை ஏற்றுக்கொள்ள முடியாது.
படையினரின் பாவனையிலுள்ள பொதுமக்களின் காணிகள் இன்னமும் மீளளிக்கப்படாமை எமக்கு அதிருப்தி அளிப்பதாக உள்ளது. மக்கள் தமது சொந்தக் காணிகளையே விடுவிக்குமாறு போராட்டங்களில் ஈடுபடுகின்றார்கள்.
இதனைக் காலந்தாழ்த்துவது மக்கள் மனதில் விரக்தியையும் ஏமாற்றத்தையும் அளிக்கின்றது. இம் மக்கள் காலாகாலமாக தாம் வாழ்ந்து வந்த இருப்பிடங்களை விடுவித்துத் தருமாறு நீண்ட காலமாகப் போராடி வருகின்றார்கள். இந்த நியாயமான கோரிக்கையைப் புறந்தள்ள முடியாது.
காணாமல் ஆக்கப்பட்டோருக்கான அலுவலகமானது தனது செயற்பாடுகளை விரைவாக ஆரம்பித்து நியாயமான விசாரணைகளை மேற்கொண்டு பாதிக்கப்பட்ட மக்களுக்கு உண்மை நிலையினை வெளிக்காட்டவேண்டும்.
நீண்ட நாட்களாகப் போராட்டங்களில் ஈடுபட்டுவரும் இந்த உறவுகளுக்கு தங்கள் அன்புக்குரியவர்களுக்கு என்ன நடந்தது என்பதை அறியும் உரித்து உண்டு.
அந்த உரிமையினை காணாமல் ஆக்கப்பட்டோருக்கான அலுவலகம் நிலை நாட்ட வேண்டும். காணாமல் ஆக்கப்பட்டோருக்கான அலுவலகமானது காணாமல் ஆக்கப்பட்டோரின் உறவுகள் திருப்தியடையும் வகையில் விசாரணைகளை மேற்கொண்டு அவர்கள் மனதில் ஆறுதலைக் கொண்டுவரும் வகையில் செயற்பட வேண்டும் என்றார்.
இதேவேளை புதிய அரசியலமைப்பு உருவாக்கம் தொடர்பில் தமது கருத்துக்களைத் தெரிவித்த இரா. சம்பந்தன், உள்ளூராட்சிமன்றங்களுக்கான தேர்தல்கள் முடிந்ததன் பிற்பாடு இந்த நடவடிக்கை துரிதப்படுத்தப்பட்டு புதிய அரசியலமைப்பு வரைவு பாராளுமன்றத்தில் சமர்ப்பிக்கப்பட்டு, பின்னர் அதுசர்வஜன வாக்கெடுப்பின் மூலம் மக்களின் அங்கீகாரத்துடன் நிறைவேற்றப்படவேண்டும்.
இந்த நடவடிக்கை மேலும் தாமதப்படுத்தப்படலாகாது. நீண்டகால தேசியப் பிரச்சினைக்குத் தீர்வுகாணும் நோக்கில் இவ்விடயம் முன்னுரிமைப்படுத்தப்பட்டு நிறைவேற்றப்பட வேண்டும். ஏற்படுத்தப்படுகின்ற புதிய அரசியலமைப்பானது நியாயமானதும் நிரந்தரமானதும் தமிழ் மக்களுக்குத் திருப்தியளிக்கக்கூடிய ஒன்றாகவும் இருக்கவேண்டும்
இந்த விடயங்கள் தொடர்பில் அரசாங்கத்தின் மந்தகதியிலான செயற்பாடுகள் தமிழ் மற்றும் சிங்கள மக்கள் மத்தியிலுள்ள கடும் போக்காளர்கள் தமது செயற்பாடுகளை முன்னெடுத்துச் செல்ல ஓர் உந்துசக்தியாக அமைகின்றது.
எனவே, இவ்விடயங்கள் தொடர்பில் அரசாங்கமானது முக்கிய கவனஞ் செலுத்தி கருமங்கள் துரிதமாக நடைபெறுவதை உறுதிசெய்ய வேண்டும். அதனைச் செய்வதற்கு சர்வதேச சமூகம் தனது தொடர்ச்சியான பயனுறுதி மிக்க ஈடுபாட்டினை இலங்கை அரசாங்கத்துடன் கொண்டிருக்க வேண்டும் என்றும் கோரியமை குறிப்பிடத்தக்கது.
