நல்லபிப்பிராயத்தை திட்டமிட்டு சிதைக்கும் கபட நோக்கம் என்கிறார் –சுமந்திரன் எம்.பி.
தமிழ்த் தேசியக் கூட்டமைப்பின் வாக்குப்பலம் இத்தேர்தலில் சிறிதும் குறைவடையாது என்பதே எங்கள் எதிர்பார்ப்பு. மக்கள் எதிர்பார்த்த விடயங்கள் நிறைவேறாமல் இருந்தாலும் கூட, ஒன்றுமே நடக்கவில்லை என எவராலும் கூறஇயலாது.
சில விடயங்கள் தொடர்பில் நாங்களும் எங்களது எதிர்ப்பை தொடர்ச்சியாக அரசாங்கத்திடம் தெரிவித்து வருகின்றோம் என தமிழ்த் தேசியக் கூட்டமைப்பின் பேச்சாளரும் யாழ். மாவட்ட எம்.பி.யுமான எம்.ஏ.சுமந்திரன் கூறினார்.
தற்போதைய அரசியல் சூழ்நிலை குறித்து அவர் வழங்கிய செவ்வியில் தெரிவித்தார்.
எமக்கு இலஞ்சமோ வேறு எந்தவிதமான பணமோ வரவு – செலவுத் திட்டத்தை ஆதரிப்பதற்கு கொடுக்கப்படவில்லை. அது முற்றிலும் உண்மைக்குப் புறம்பான குற்றச்சாட்டு என்றும் அவர் கூறினார்.
மேலும் அவர் கூறுகையில்,
அனைத்துப் பாராளுமன்ற உறுபபினர்களுக்கும் அரசாங்கம் முன்னெடுக்கும் அபிவிருத்திப் பணிகளில் எதற்கு முன்னுரிமை கொடுக்கவேண்டுமென்று முன்மொழிகின்ற உரித்து கொடுக்கப்பட்டுள்ளது. அண்மையில் யாழ். மாவட்ட செயலாளர் கூறியதைப் போன்று கடந்த வருடத்தின் நடுப்பகுதியில் வடக்கு, கிழக்குக்கு கூடுதலாக நிதி ஒதுக்கப்படவேண்டும் என்று கூறப்பட்டது.
அத்துடன் யாழ்ப்பாண அபிவிருத்திக்கென பிரதமரின் அமைச்சினூடாக 310 மில்லியன் ரூபா ஒதுக்கப்பட்டுள்ளதாகவும் அவர் தெரிவித்திருந்தார்.
ஒவ்வொரு பாராளுமன்ற உறுப்பினரும் என்னென்ன தேவைகளுக்கு அதை உபயோகப்படுத்தலாம் என்று சில முன்மொழிவுகளை செய்யவேண்டும் என்று கோரப்பட்டது. நாங்களும் அதைத்தான் செய்தோம். இதனால் நிதி யாருடைய கைக்கும் வரப்போவதில்லை. அரசாங்கம் நிதியை எம்முடைய கைகளுக்குக் கொடுத்து அபிவிருத்திப் பணிகளை செய்யச் சொல்வதும் இல்லை.
நேரடியாக மாவட்ட செயலகம் மூலமாக மேற்கொள்ளும் அபிவிருத்திப் பணிகளில் எந்தெந்த பணிகளுக்கு முன்னுரித்து கொடுக்கவேண்டும் என்று முன்மொழிகின்ற உரித்தை மக்களால் தெரிவுசெய்யப்பட்ட பிரதிநிதிகளுக்குக் கொடுப்பார்கள்.
வரவு – செலவுத் திட்டத்துக்கும் இதற்கும் சம்பந்தம் இல்லை. வரவு – செலவுத் திட்டத்துக்கு பல மாதங்களுக்கு முன்னரே இது நடந்தது. இதை வைத்துக்கொண்டு தமிழ்த் தேசியக் கூட்டமைப்பின் பாராளுமன்ற உறுப்பினர்கள் வரவு – செலவுத் திட்டத்துக்கு ஆதரவு வழங்கியதற்காக அரசாங்கத்திடம் இருந்து 2 கோடி ரூபா இலஞ்சம் பெற்றுள்ளனர் என்ற பிரசாரம் முன்னெடுக்கப்பட்டு வருகின்றது.
இது மக்களுக்கு தமிழ்த் தேசியக் கூட்டமைப்பின் மீதுள்ள நல்ல அபிப்பிராயத்தை சிதைப்பதற்காக வேண்டுமென்றே ஏற்படுத்தப்பட்ட ஒரு நிகழ்ச்சி நிரலாகும். தம்முடைய சட்டவிரோத ஊழல் நடவடிக்கைகளை மூடி மறைப்பதற்கு எவ்வித அடிப்படையும் இல்லாத பொய்க்குற்றச்சாட்டுக்கள் எம்மீது சுமத்தப்பட்டுக் கொண்டிருக்கின்றன.
எம்மீது இப் பொய்க்குற்றச்சாட்டை சுமத்திய குறித்த நபர் பல வருடங்களாக அரசுக்குச் சொந்தமான அடுக்குமாடிக்கட்டடத்தை எவ்வித வாடகையும் செலுத்தாமல் சட்டவிரோதமாக தன்னுடைய கையிருப்பில் வைத்திருந்தார். மிக அண்மையில் தேர்தல் ஆணையகம் உத்தரவிட்ட பின்னரே அது அரசாங்கத்திடம் கையளிக்கப்பட்டதாக எங்களுக்கு தெரியவந்துள்ளது என்றும் அவர் விளக்கினார்.
தொடர்ந்து அவர் கூறுகையில்,
அரசியலமைப்புப் பணிகளும் தேர்தல்களும்
எந்தத் தேர்தலுக்கு முன்னும் அரசியலமைப்புச் சட்டம் உருவாக்கப்பட வேண்டும். அதற்கான சர்வஜன வாக்கெடுப்பைத் தான் முதன்முதலில் நடத்தவேண்டும் என்பதுதான் எங்களுடைய நிலைப்பாடாக இருந்தது. ஏனைய கட்சிகள் கூட அதே நோக்கத்தில் தான் இருந்தன.
ஆனால், அரசியலமைப்பு உருவாக்கப் பணியும் ஏனைய செயற்பாடுகளைப் போன்று இழுத்தடிக்கப்பட்டு வந்து, அதுவும் அரைவாசித் தூரம் கடந்துவிட்ட நிலையில்தான் இவ் உள்ளூராட்சித் தேர்தல் குறிக்கிட்டுள்ளது.
தேர்தல்களுக்கு முதல் அரசியலமைப்புப் பணி முடிவுறவேண்டும் என்று நாங்கள் எதிர்பார்த்தமைக்கு காரணம் நல்லாட்சி அரசாங்கத்தில் பிரதானமாக அங்கம் வகிக்கின்ற கட்சிகள் ஒன்றாக இருக்கும் நிலையே அரசியலமைப்பு உருவாக்கத்துக்கு சிறந்ததாகும்.
தேர்தல் என்று வந்தால் அவ்விரு கட்சிகளும் ஒன்றோடு ஒன்று போட்டி போட்டுக்கொள்ளும். இதனால் சிலவேளை நல்லிணக்க அரசாங்கம் உடைந்து விழக்கூடிய சாத்தியக் கூறுகள் காணப்படலாம் என்றே அரசியலமைப்புப் பணிகளை விரைவுபடுத்தவேண்டும் என்ற நிலைப்பாட்டில் இருந்தோம்.
ஆனால், நல்லாட்சி அரசாங்கம் இன்றைக்கு அல்லது நாளைக்கு உடையும் என்று தென்பட்டபோதிலும், தற்போது நடைபெறும் விடயங்களை வைத்துப் பார்த்தால், எவ்வளவு தான் இரு கட்சிகளுக்கிடையில் முறுகல் நிலைகள் வந்தாலும் தேசிய அரசாங்கம் உடைந்து விழாது இரு கட்சிகளும் ஒன்றாகவே இருக்கும் என்பது தெளிவாகின்றது.
ஆனபடியினால் தேர்தல் முடிந்தபின்னர் உடனடியாக அரசியலமைப்பு உருவாக்கப்பணிகள் நடைபெறவேண்டும் என்பதே எங்களின் நிலைப்பாடு.
உபகுழுக்களின் அறிக்கை தொடர்பான விவாதத்துக்கு இன்னும் திகதிகள் நிர்ணயிக்கப்படவில்லை. ஆனால், முன்னைய விவாதங்கள் நடைபெற்றபின்னர் வழிநடத்தல் குழு ஒன்றுகூடி அரசியலமைப்புக்கான வரைபை தயாரிக்கலாம் என நிபுணர்களுக்கு பணித்துள்ளது. ஆகவே, உள்ளூராட்சி மன்றத் தேர்தல் முடிவுற்ற பின்னர் அவர்களுடைய வரைபு தயாராக இருக்கும் என நம்புகின்றோம் என்றார்.
கேள்வி: லண்டனில் நீங்கள் பேசவிருந்த கூட்டம் திடீரென இரத்தானதாக கூறப்பட்டதே அது குறித்த உங்கள் கருத்தென்ன?
பதில்: கடந்த 17 ஆம் திகதி பிணைமுறி சம்பந்தமான அறிக்கை பாராளுமன்றத்தில் சமர்ப்பிக்கப்படவிருந்த காரணத்தினால் எனது லண்டன் பயணத்தை பிற்போட்டிருந்தேன். ஆனாலும், கூட்டம் நடைபெறவிருந்த நேரத்தில் அங்கு சமுகமளிக்கக் கூடிய நிலையே காணப்பட்டது.
எனினும், நான் அவர்களுக்கு அனுப்பிய செய்தியில், கூட்டம் பிற்போடப்பட்டுள்ளது எனத் தெரிவித்திருந்தேன் அதை வைத்து நான் உரிய நேரத்திற்கு வரமாட்டேன். அதனால் கூட்டத்திற்கு சமுகமளிக்க மாட்டேன் என்று கூட்டத்தை இரத்து செய்துவிட்டார்கள்.
அதன் காரணமாகவே கூட்டம் இரத்துச் செய்யப்பட்டது. எந்த எதிர்ப்பின் காரணமாகவும் கூட்டம் இரத்துச் செய்யப்படவில்லை. பொதுவாக இங்குள்ள எல்லா ஊடகங்களும் இது தொடர்பில் கூட்டத்தை இரத்துச் செய்த எங்களிடம் கேட்காமல், எதிர்பார்ப்பாட்டங்களாலும் அநோமாதேய சுவரொட்டிகள் காரணமாகவும் கூட்டம் இரத்துச் செய்யப்பட்டதாக செய்திகளை வெளியிட்டிருந்தார்கள்.
மேலும், கனடாவில் மூன்று கூட்டங்கள் நடைபெற்றன. அதில் கலந்துகொண்டுள்ள புலம்பெயர் அமைப்புக்கள் தமிழ்த் தேசியக் ௬ட்டமைப்பு தமிழ் மக்கள் தொடர்பில் கொண்டுள்ள நிலைப்பாட்டை வரவேற்றன என்றார்.
உள்ளூராட்சித் தேர்தல் தொடர்பில் அவர் கூறுகையில்,
உள்ளூராட்சித் தேர்தல் என்பது உள்ளூர் விடயங்கள் சம்பந்தமானது. ஆனால் எங்களுக்கு எதிராக தேர்தலில் போட்டியிடும் பலர் இடைக்கால அறிக்கையை நிராகரிக்கும் தேர்தலாக இதைப் பயன்படுத்துங்கள் என்றெல்லாம் அறிக்கை விட்டுக்கொண்டிருப்பதால் நாங்கள் இது பற்றி விளக்கம் சொல்லியிருக்கின்றோம்.
அதாவது இடைக்கால அறிக்கையில் நாங்கள் எவ்வளவு தூரம் முன்னேறியிருக்கின்றோம்? என்று மக்களுக்கு தெளிவுபடுத்தல்களை மேற்கொண்டுவருகின்றோம். மேலும் ஒற்றையாட்சி இலங்கைக்கு பொருத்தமற்றது என்று இடைக்கால அறிக்கை கூறுகின்றது.
அது பற்றியும் அதன் உள்ளடக்கம் பற்றியும் குறிப்பிடப்பட்டுள்ளது. ஆகவே அதை நிராகரிக்கவேண்டிய தேவை இல்லை. அதை வரவேற்கவேண்டிய தேவையே மக்களுக்கு இருக்கின்றது. ஆகவே, அவர்கள் கூறிய காரணத்தால் இடைக்கால அறிக்கையை நிராகரிப்பதற்கு இத் தேர்தலை நிராகரியுங்கள் என்று ௬றுவதில் எவ்வித அர்த்தமும் இல்லை. இவர்கள் இவ்வாறு தெரிவிப்பதால் தீர்வு விடயங்கள், இடைக்கால அறிக்கை போன்ற விடயங்கள் தொடர்பில் மக்களுக்கு தெளிவுபடுத்தி வருகின்றோம்.
கேள்வி: காணாமல்போனோர் பற்றிய அரசின் கரிசனை எவ்வாறுள்ளது?
பதில்: காணாமல்போனோருக்கான அலுவலகமே காணாமல்போனோர் தொடர்பான பிரச்சினையைத் தீர்ப்பதற்கான பொறிமுறை. அது அனைவராலும் ஏற்றக்கொள்ளப்பட்ட விடயம்.
அதுதான் சர்வதேச சமூகத்துக்கு இலங்கை அரசாங்கம் கொடுத்த வாக்குறுதி. சர்வதேச நிபுணர்கள் மூலமே அவ்வலுவலகத்தை அமைப்பதற்கான சட்டங்களும் தயாரிக்கப்பட்டன. சட்டங்கள் நிறைவேற்றப்பட்டு, அவை ஒருவருட காலமாக நடைமுறைப்படுத்தாமல் அரசாங்கம் இழுத்தடித்தது உண்மை. அக்காலகட்டத்தில் நாங்கள் அரசாங்கத்திற்கு பலதடவைகள் அழுத்தங்களைக் கொடுத்துள்ளோம்.
ஆனால், சென்ற வருட இறுதியிலிருந்து இது நடைமுறைப்படுத்தப்பட்டு வருகின்றது. தற்போது இதற்கு ஆணையாளர்களும் அரசியலமைப்புக்குழுவால் நியமிக்கப்பட்டுள்ளார்கள். ஆகவே, அந்த அலுவலகம் உடனடியாக நடைமுறைக்கு வரவேண்டும்.
அதை நடைமுறைப்படுத்த சென்ற வரவு – செலவுத் திட்டத்தில் 2018 ஆம் ஆண்டுக்கு மாத்திரம் 1400 மில்லியன் ஒதுக்கப்பட்டுள்ளது. தேவைக்கு அதிகமான நிதி அதற்காக ஒதுக்கப்பட்டுள்ளது. ஆகவே, அது விரைவில் செயற்படுத்தப்படும் என நாங்கள் எதிர்பார்க்கின்றோம் என்றார்.
