நல்லாட்சி தேசிய அரசாங்கத்துக்குள் ஐக்கிய தேசியக் கட்சிக்கும் சுதந்திரக் கட்சிக்கும் இடையிலான இருதரப்பு மோதல்கள் கடுமையாகியுள்ளன. ஜனாதிபதியின் சவாலுக்கு பதில் அளிக்கும் வகையில் பிரதமர் ரணில் விக்கிரமசிங்க பிணைமுறி மோசடி அறிக்கை மீதான விவாதத்தை உள்ளூராட்சி மன்றத் தேர்தலுக்கு முன்னர் நடத்துவதாக தெரிவித்துள்ளார்.
இலங்கை மத்திய வங்கியின் சர்ச்சைக்குரிய பிணைமுறி தொடர்பான ஜனாதிபதி ஆணைக்குழுவின் அறிக்கை மற்றும் பாரிய ஊழல் மோசடி தொடர்பான ஜனாதிபதி ஆணைக்குழுவின் அறிக்கைகளின் மீதான விவாதம்
எதிர்வரும் 8 ஆம் திகதி வியாழக்கிழமை நடத்தப்படும். இதற்காக பாராளுமன்றத்தை கூட்டுவதற்கான கடிதத்தை நாளை திங்கட் கிழமை சபாநாயகருக்கு அனுப்பி வைக்கவுள்ளதாக பிரதமர் ரணில் விக்கிரமசிங்க அறிவித்துள்ளார் .
காலி – தெனியாய பகுதியில் நேற்று இடம்பெற்ற மக்கள் சந்திப்பில் கலந்து கொண்டு உரையாற்றும் போதே பிரதமர் ரணில் விக்கிரமசிங்க குறித்த திகதிக்கு முன்னர் பாராளுமன்றத்தை கூட்டி சர்ச்சைக்குரிய இரண்டு விசாரணை அறிக்கைகள் மீதான விவாதத்தை நடத்துவதாக குறிப்பிட்டார்.
இலங்கை மத்திய வங்கி பிணைமுறி அறிக்கை தொடர்பான ஜனாதிபதி ஆணைக்குழு மற்றும் பாரிய ஊழல் மோசடி தொடர்பான ஜனாதிபதி ஆணைக்குழுவின் அறிக்கைகளின் மீதான விவாதத்தை பெப்ரவரி மாதம் 20 மற்றும் 21 ஆம் திகதிகளில் நடத்துவதற்கு கடந்த 24 ஆம் திகதி புதன் கிழமை இடம்பெற்ற கட்சித் தலைவர்கள் கூட்டத்தில் தீர்மானிக்கப்பட்டது.இதன்படி குறித்த இரு தினங்களிலும் பிற்பகல் 1 மணி தொடக்கம் 6 மணி வரை விவாதிப்பதற்கு முடிவு செய்யப்பட்டது.
அத்துடன் பிணைமுறி மோசடி தொடர்பான ஜனாதிபதி ஆணைக்குழு அறிக்கையின் 103 பக்கங்கள் குறைவடைந்தமை தொடர்பாக ஏற்பட்ட சிக்கல் தொடர்பில் ஜனாதிபதி மைத்திரிபால சிறிசேன கட்சித் தலைவர்களை பிரத்தியேகமாக சந்தித்து அறிவுறுத்துவதாகவும் குறிப்பிட்டிருந்தார்.
மேலும் பாராளுமன்றத்தின் புதிய ஒழுக்கங்கள் மற்றும் நிலையியற் கட்டளை மறுசீரமைப்பு தொடர்பில் பெப்ரவரி மாதம் 19 ஆம் திகதி பேச்சுவார்த்தை நடத்தவும் இணக்கம் காணப்பட்டது.
மேலும் உள்ளூராட்சிமன்றத் தேர்தலுக்கு முன்னர் விசாரணை அறிக்கைகள் மீதான பாராளுமன்றத்தை நடத்தி காட்டுமாறு கடந்த வியாழக்கிழமை ஜனாதிபதி மைத்திரிபால சிறிசேன பாணந்துறையில் இடம்பெற்ற கூட்டத்தில் சவால் விடுத்திருந்தார்.
நல்லாட்சியில் உள்ள இருபக்க திருடர்களும் விவாதத்தை காலம் கடத்தியுள்ளதாகவும் இதன் போது ஜனாதிபதி கடுமையாக சாடியிருந்தார்.
மறு புறம் உள்ளூராட்சிமன்றத் தேர்தலுக்கு முன்னர் பிணைமுறி மோசடி தொடர்பான ஜனாதிபதி விசாரணை மீதான அறிக்கை மீதான பாராளுமன்ற விவாதத்தை நடத்த வேண்டும் என மக்கள் விடுதலை முன்னணியும் சபாநாயகருக்கு கடிதம் அனுப்பி கேட்டுக்கொண்டுள்ளது.
இவ்வாறானதொரு நிலையில் பிரதமர் ரணில் விக்கிரமசிங்க உள்ளூராட்சிமன்றத் தேர்தலுக்கு முன்னர் சர்ச்சைக்குரிய இரண்டு விசாரணை அறிக்கைகள் மீதான பாராளுமன்ற விவாதத்தை நடத்துவது குறித்த தீர்மானத்தை அறிவித்துள்ளார்.
இதற்கான உத்தியோக பூர்வ கடிதத்தை நாளை சபாநாயகருக்கு அனுப்பி வைக்க உள்ளார். அதன் பின்னர் சபாநாயகர் கட்சித் தலைவர்கள் கூட்டத்தை அவசரமாகக் கூட்டி பாராளுமன்றத்தில் விவாதம் நடத்தும் திகதி குறித்து இறுதி தீர்மானத்தை அறிவிப்பார்.
