நடிகர் ரஜினிகாந்தை வைத்து அவரது மகள் சௌந்தர்யா இயக்கிய ‘கோச்சடையான்’ படத்துக்காக லதா ரஜினிகாந்த் வாங்கிய கடனை 3 மாதத்துக்குள் திருப்பிக் கொடுக்க உயர் நீதிமன்றம் உத்தரவிட்டுள்ளது.
சௌந்தர்யா ‘கோச்சடையான்’ என்ற 3 டி அனிமேஷன் படம் 2014ஆம் ஆண்டு வெளியானது. பெரியதொரு பொருட்செலவில் தயாரான இந்தப் படத்துக்கு ரஜினி படத்துக்கு அளிக்கும் வரவேற்பை ரசிகர்கள் வழங்காதமையால் படம் தோல்வியடைந்தது.
இதனால் தயாரிப்பாளர் களுக்கு நஷ்டம் ஏற்பட்டது.
கோச்சடையான் படத்தை விநியோகம் செய்ததில் லதா ரஜினிகாந்த் வாங்கிய 10 கோடி இந்திய ரூபா பணத்தைத் திரும்ப தராமல் மோசடி செய்ததாக 2015ஆம் ஆண்டு சென்னை காவல் ஆணையர் அலுவலகத்தில் ஆட் பீரோ தனியார் நிறுவன நிர்வாகி அபிர்சந்த் நாகர் குற்றச்சாட்டை முன்வைத்தார்.
ஆனால், லதா ரஜினிகாந்த் மீதான குற்றச்சாட்டுக்கு மறுப்புத் தெரிவித்த படத்தயாரிப்பாளரான ‘மீடியா ஒன் குளோபல்’ நிறுவனம் விளக்கமளித்திருந்தது. அதில், பட பரிவர்த்தனைகளில் லதா ரஜினிகாந்த் ஒருபோதும் தலையிடவில்லை என கூறியிருந்தது.
‘கோச்சடையான்’ படத்தின் தயாரிப்புப் பணிகளுக்காகக் கொடுக்கப்பட்ட தொகையை ரஜினிகாந்த் தலையிட்டு பெற்றுத் தர வேண்டும் என குறித்த நிறுவனத்தினர் வேண்டுகோள் விடுத்திருந்தனர்.
இது தொடர்பாக அபிர்சந்த் நாகர், மதுபாலா ஆகியோர் 2015ஆம் ஆண்டு செய்தியாளர்களுக்கு வழங்கிய செவ்வியில், ‘கோச்சடையான்’ திரைப்படம் கடந்த 2014 ஆண்டு மே மாதம் வெளியானது.
இப்படத்தின் தயாரிப்புப் பணிகளுக்காக மீடியா ஒன் நிறுவனம் எங்களிடம் 10 கோடி இந்திய ரூபாவைக் கடனாகப் பெற்றது.
மீடியா ஒன் நிறுவனத்துக்காக கடன் ஒப்பந்தத்தில் லதா ரஜினிகாந்த் கையெழுத்திட்டதோடு, படம் வெளியானதும் பணத்தைத் திருப்பிக் கொடுத்துவிடுவதாக உறுதியுமளித்திருந்தார். அதற்கான ஆதாரம் எங்களிடம் உள்ளது.
இந்தப் பிரச்சினை குறித்து அவர் பதில் கூற மறுக்கிறார்.
கடந்த சில மாதங்களுக்கு முன்பே இந்தப் பிரச்சினையை ரஜினிகாந்த் கவனத்துக்கு கொண்டு செல்ல நினைத்தோம். இந்தப் பிரச்சினையில் ரஜினிகாந்த் தலையிட்டு பணத்தைப் பெற்றுத் தரவேண்டும்” என அப்போது தெரிவித்திருந்தனர்.
இந்த வழக்கில் உயர் நீதிமன்றத் தீர்ப்பையடுத்து, ஆட் பீரோ சார்பில் உயர் நீதிமன்றத்தில் மேன்முறையீடு செய்யப்பட்ட இந்த வழக்கு நேற்று முன்தினம் விசாரணைக்கு வந்தது. விசாரணையின்போது உயர் நீதிமன்ற நீதிபதி லதா ரஜினியிடம் சில கேள்விகளை முன்வைத்தார்.
வாங்கிய பணத்தை ஏன் திருப்பித் தரவில்லை? எப்போது கொடுப்பீர்கள் என இன்றே நேற்று முன்தினம் பதிலளிக்க வேண்டும். பணத்தைத் திருப்பித் தராவிட்டால் குற்றவியல் நடவடிக்கை மேற்கொள்ளப்படும் என உத்தரவிட்டு வழக்கைத் தள்ளி வைத்தார்.
அன்று மாலை மீண்டும் விசாரணைக்கு வந்தபோது 12 வாரங்களில் பணத்தைத் திருப் பித் தந்து விடுவதாகத் தெரிவிக்கப் பட்டது. அதை ஏற்றுக்கொண்ட உயர் நீதிமன்றம் எதிர்வரும் 3 மாதத்துக்குள் பணத்தைத் திருப் பித்தர உத்தரவிட்டுள்ளமை குறிப் பிடத்தக்கது.
