தமிழ் மொழி தமிழர்களினதும், தமிழ் பேசும் பலரினதும் தாய்மொழி ஆகும். தமிழ் திராவிட மொழிக் குடும்பத்தின் முதன்மையான மொழிகளில் ஒன்றும் செம்மொழியும் ஆகும்.
இலங்கை இந்தியா மலேசியா சிங்கப்பூர் ஆகிய நாடுகளில் அதிக அளவிலும் ஐக்கிய அரபு அமீரகம், தென்னாப்பிரிக்கா மொரிசியஸ் பிஜி ரீயூனியன் டிரினிடாட் போன்ற நாடுகளில் சிறிய அளவிலும் தமிழ் பேசப்படுகிறது.
1997-ம் வருடப் புள்ளி விவரப்படி உலகம் முழுவதிலும் 80 மில்லியன் மக்களால் பேசப்படும் தமிழ், ஒரு மொழியைத் தாய்மொழியாகக் கொண்டு பேசும் மக்களின் எண்ணிக்கை அடிப்படையில் பதினெட்டாவது இடத்தில் உள்ளது.இரண்டாயிரத்து ஐந்நூறு வருடங்களுக்கும் மேல் பழைமை வாய்ந்த இலக்கிய மரபைக் கொண்டுள்ள தமிழ் மொழி, தற்போது வழக்கில் இருக்கும் ஒரு சில செம்மொழிகளில் ஒன்றாகும்.
திராவிட மொழிக்குடும்பத்தின் பொதுக்குணத்தினால் ஒலி மற்றும் சொல்லமைப்புகளில் சிறிய மாற்றங்களே ஏற்பட்டுள்ளதாலும், மேலும் கவனமாகப் பழைய அமைப்புக்களைக் காக்கும் மரபினாலும், பழங்கால இலக்கிய நடை கூட மக்களால் புரிந்து கொள்ளும் நிலையில் உள்ளது.எடுத்துக்காட்டாக, பாடசாலைக் குழந்தைகள் சிறுவயதில் கற்கும் அகர வரிசையான ஆத்திசூடி 1,000 வருடங்களுக்கு முன்னர் இயற்றப்பட்டது. திருக்குறள் ஏறத்தாழ 2,000 வருடங்களுக்கு முன் இயற்றப்பட்டது.
மேலும், 2004 ஆம் வருடம் ஜூன் 6 ஆம் திகதி தமிழ்மொழி செம்மொழியாக அறிவிக்கப்பட்டமை குறிப்பிடத்தக்கது.
