தமிழ் தேசியக் கூட்டமைப்பின் நாடாளுமன்ற உறுப்பினர் ஒருவரை கொலை செய்யும் நோக்குடன் முன்னாள் போராளிகள் சிலர், புலம்பெயர் தமிழர்கள் சிலரால் தயார்ப்படுத்தப்பட்டுள்ளனர் என நான்கு தினங்களுக்கு முன்னர் இராணுவ புலனாய்வுப் பிரிவு, பொலிஸாருக்கு சிவப்பு எச்சரிக்கை விடுக்கப்பட்டிருந்தது.
அதுதொடர்பில் பொலிஸ் புலனாய்வுப் பிரிவு உஷார்ப்படுத்தப்பட்டது. தற்போது விடுதலைப் புலிகள் அமைப்பின் சீருடை, கொடியுடன் கிளைமோர்க் குண்டும் மீட்கப்பட்டுள்ளன.எனவே நாடாளுமன்ற உறுப்பினரை கொலை செய்யும் நோக்குடன் அவை எடுத்துவரப்பட்டிருக்கலாம் என்ற கோணத்தில் தற்போது விசாரணைகள் இடம்பெறுகின்றன என பொலிஸ் உயர்மட்ட தகவல்கள் தெரிவிக்கின்றன.
வீதிச் சுற்றுக்காவலில் ஈடுபட்டிருந்த பொலிஸார் முச்சக்கர வண்டியை வழிமறித்து சோதனையிட முற்பட்ட போது, அதன் சாரதியும் மற்றொருவரும் தப்பிஓடிவிட்டனர்.
முச்சக்கர வண்டியை சோதனையிட்ட போது, அதற்குள்ளிருந்து 20 கிலோ கிராம் எடையுடைய கிளைமோர் குண்டு, அதனை மறைந்திருந்து இயக்கும் ரிமோல்ட் உள்ளிட்ட கருவிகள், தமிழீழ விடுதலைப் புலிகள் அமைப்பின் சீருடை மற்றும் புலிக் கொடி ஒன்று மீட்கப்பட்டன என்று இன்று காலையில் பொலிஸார் கூறியிருந்தனர்.
முச்சக்கர வண்டி சோதனை நடத்தப்பட்ட இடத்துக்கு அண்மையில் சந்தேகத்துக்கிடமாக நடமாடிய ஒருவர் இன்று அதிகாலை கைது செய்யப்பட்டார்.அவரிடம் விசாரணைகள் இடம்பெறுகின்றன’ என்று பொலிஸ் உயர்மட்டம் தெரிவிக்கின்றது.
மதியமளவில் இன்னொருவரும் கைதாகினார்.கைது செய்யப்பட்ட இருவரும் கிளிநொச்சியைச் சேர்ந்தவர்கள். தப்பி ஓடியவரும் கிளிநொச்சியைச் சேர்ந்தவர் என பொலிசார் கூறுகின்றனர்.நெடுங்கேணிப் பகுதியிலிருந்து ஒட்டுசுட்டான் பகுதி வழியாக புதுக்குடியிருப்பு வீதியில் பயணித்த போதே முச்சக்கர வண்டி பொலிஸாரால் மீட்கப்பட்டது.
கைது செய்யப்பட்ட இருவரிடமும் வாக்குமூலங்கள் பெறப்பட்டன. தமக்கு என்ன நோக்கம் எனத் தெரியாது என அவர்கள் தெரிவித்துள்ளனர்.தப்பிஓடியவருக்குதான் கிளைமோர் உள்ளிட்டவை தொடர்பான தகவல் தெரியும் என அவர்கள் வாக்குமூலமளித்துள்ளனர்’ என்று பொலிஸ் ஊடகப் பிரிவு மேலும் தெரிவித்துள்ளது .
