தனது அரசியல் நலனுக்காக முரணான கூற்றினை வெளிப்படுத்தி தவறான புரிதலை ஏற்படுத்துவதற்கு முன்னாள் பாதுகாப்புச் செயலாளர் கோத்தாபய ராஜபக் ஷ எத்தனிப்பதாக புளொட் அமைப்பின் தலைவரும் தமிழ்த் தேசியக் கூட்டமைப்பின் யாழ்.மாவட்ட பாராளுமன்ற உறுப்பினருமான தருமலிங்கம் சித்தார்த்தன் சீற்றமான கருத்துக்களை முன்வைத்துள்ளார்.
புளொட் அமைப்பிடமிருந்து ஆயுதங்களை களைந்தால் தமிழ்த் தேசியக் கூட்டமைப்புடன் இணைந்து கொள்வேன் என சித்தார்த்தன் தன்னிடம் தெரிவித்ததாக கோத்தாபய ராஜபக் ஷ தெரிவித்துள்ளமை தொடர்பாக கருத்து வெளியிடும்போதே அவர் மேற்கண்டவாறு தெரிவித்தார்.
அவர் மேலும் தெரிவிக்கையில்,
2009ஆம் ஆண்டின் இறுதிக்காலப்பகுதியில் புளொட் அமைப்பிடமிருந்த ஆயுதங்களை கையளிக்குமாறு கோரிக்கை விடுக்கப்பட்டது. அச்சமயத்தில் எமது அமைப்பு ஆயுதங்களை கையளித்து விட்டது.
யுத்தத்தின் பின்னரான சூழலில் ஆயுதங்களை வைத்திருக்க வேண்டிய அவசியமும் எமக்கு இருக்கவில்லை. அதேநேரம் 2009ஆம் ஆண்டு ஓகஸ்ட் 8ஆம் திகதி வவுனியா நகர சபைக்கும், யாழ்.மாநகர சபைக்கும் நடைபெற்ற தேர்தலிலும் நாம் தனித்து போட்டியிட்டோம்.
அதன் பின்னர் 2010ஆம் ஆண்டு ஏப்ரலில் நடைபெற்ற பாராளுமன்றத் தேர்தலிலும் நாம் தனித்தே போட்டியிட்டோம்.
யுத்தம் நிறைவடைந்த சூழலில் தமிழர் உரிமைப்போராட்டத்தில் ஈடுபட்ட அனைத்து தரப்புக்களும் ஒன்றிணைய வேண்டும் என்ற கோரிக்கைகள் அதிகரித்தன.
யுத்தத்தின் பின்னரான நிலையில் தமிழ் மக்களின் உரிமைக்காக போராடிய தரப்புக்கள் பலவீனமான நிலையில் இருப்பது பொருத்தமானதல்ல என்பதையும் நாம் உணர்ந்திருந்தோம். இதனடிப்படையிலும் கொள்கைரீதியான இணக்கத்தின் பேரிலுமே 2011ஆம் ஆண்டு தமிழ்த் தேசியக் கூட்டமைப்பில் இணைந்தோம்.
ஆகவே முன்னாள் பாதுகாப்புச் செயலாளர் கோத்தாபய ராஜபக் ஷ குறிப்பிடுவது போன்று தமிழ்த் தேசியக் கூட்டமைப்பில் இணைந்தமைக்கும், ஆயுதங்களை கையளித்தமைக்கும் எவ்விதமான தொடர்புகளும் கிடையாது. அவரைப் பொறுத்தவரையில் அரசியல் நலன்களுக்காக முற்றிலும் மாறுபட்ட கருத்துக்களை முன்வைக்கின்றார்.
இதன் மூலம் தமிழ்த் தேசியக் கூட்டமைப்பினுள்ளும், தமிழ் மக்களிடத்திலும் தவறான புரிதலை ஏற்படுத்தி அரசியல் ஆதாயம் தேடவே எத்தனிக்கின்றார். ஆகவே எமது ஆயுதக்களைவு சம்பந்தமான அவருடைய கருத்துக்களை நாம் முற்றாக நிராகரிக்கின்றோம் என்றார்.
