யாழ்ப்பாணம் ஊர்காவற்றுறை நாரந்தனை வடக்கை பிறப்பிடமாகவும் வவுனியா தோணிக்கல்லை வசிப்பிடமாகவும் கொண்ட கணேசலிங்கம் வேகாவனம் கடந்த 09.12.2018 அன்று உடல்நலக் குறைவு காரணமாக கொழும்பில் காலமானார்.
இவரது கடைசி மகள் இவ்வருடம் நடைபெற்று வரும் க.பொ.த சாதாரண தர பரீட்சைக்கு தோற்றி வருவதனால், தந்தையின் இறுதிச் சடங்குகள் பிற்போடப்பட்டுள்ளதாக தெரியவருகின்றது. இது குறித்து தெரியவருவதாவது..
கடந்த வாரம் க.வேகாவனம் என்பவர் இரவு உணவு உட்கொண்ட நிலையில் திடீர் என்று இயலாமை காரணமாக வவுனியா வைத்தியசாலையில் அனுமதிக்கப்பட்டு அங்கு சிகிச்சை பயனளிக்க முடியாத நிலையில் வீடு செல்லும்படி வைத்தியர்களால் ஆலோசனை வழங்கப்பட்டுள்ளது.பின்பு மேலதிக சிகிச்சைக்கான முயற்சியில் குடும்பத்தினர் கடந்த 7ம் திகதி கொழும்பில் தனியார் மற்றும் அரச வைத்தியசாலைகளில் சிகிச்சைக்கான முயற்சிகளை மேற்கொண்ட போதும், சிகிச்சை பயனின்றி கடந்த 09 ஆம் திகதி காலமானார்.
அவரின் மகள் வவுனியாவில் பிரபல மகளீர் பாடசாலையில் பரீட்சைக்குத் தோற்றிவருகின்றார். எனவே இவரின் பரீட்சைக்கு இடையூறு ஏட்படக் கூடாது என்ற வகையிலும் தந்தையின் ஆத்மா சாந்திக்கான திருப்தியைக் கொடுக்கும் வகையிலும் இவர் பரீட்சை எழுதி முடியும்வரை தந்தையின் இறுதிக் கிரிகைகளை ஒத்திவைத்துள்ளதாக தெரிய வருகின்றது.
இந்நிலையில், மகளின் பரீட்சை நாளை (12.12.2018) நிறைவுற்றதும் மதியம் 2 மணிக்கு தந்தையின் இறுதிச் சடங்குகள் இடம்பெறவுள்ளமை குறிப்பிடத்தக்கது.
