தமிழகத்தில் இருந்து புறப்பட்ட விமானம், நிகழவிருந்த திகில் சம்பவம்!

திருச்சி விமான நிலையத்தில் இருந்து சிங்கப்பூர் பயணமான விமானத்தில் நடுவானில் கோளாறு ஏற்பட்டதன் காரணமாக சென்னை விமான நிலையத்தில் அவசரமாக தரையிறக்கப்பட்டது என்ற தகவல் கிடைத்துள்ளது.

சிங்கப்பூருக்கு பயணமான ஸ்கூட் பயணிகள் விமானம் 165 பயணிகள் உட்பட 7 ஊழியர்கள் என சுமார் 172 பேருடன் திருச்சி விமான நிலையத்தில் இருந்து புறப்பட்டது. இன்று அதிகாலையில் புறப்பட்ட சிறிது நேரத்தில் விமானத்தின் ஸ்டோர் ரூமில் இருந்து புகை வருவதை விமானி பார்த்துள்ளார்.

இதையடுத்து உஷாரான விமானி உடனடியாக சென்னை விமான நிலைய கட்டுப்பாட்டு அறையை தொடர்பு கொண்டார். நிலைமையை அறிந்து கொண்ட சென்னை விமான நிலைய அதிகாரிகள், அவசரமாக சென்னை விமான நிலையத்தில் தரையிறங்க அனுமதி அளித்தனர். இதை அடுத்து இன்று காலை 3.40 மணிக்கு சென்னை விமான நிலையத்தில் விமானம் அவசரம் அவசரமாகத் தரையிறக்கப்பட்டது.

விமானம் தரையிறங்கியவுடன் விமானத்தில் இருந்த பயணிகள் மற்றும் ஊழியர்கள் உள்ளிட்ட அனைவரும் பாதுக்காப்பாக வெளியேற்றப்பட்டனர். விமானத்தின் ஸ்டோர் ரூமில் இருந்து புகை வெளியேறியதற்கு மின் கசிவு தான் காரணமாக இருக்கலாம் என்று தெரிகிறது. பிரச்சனை சரி செய்த பிறகு விமானம் சிங்கப்பூர் பயணமாகும் என எதிர்பார்க்கப்படுகிறது.