கடக ராசிக்கு குருப்பெயர்ச்சி பலன்கள்.!

மங்களகரமான விகாரி வருடம் வாக்கிய பஞ்சாங்கத்தின் அடிப்படையில் ஐப்பசி மாதம் 11ஆம் (28.10.2019) தேதியின் பின்னிரவு இயற்கை சுபரான குருதேவர் பிரதமை திதியில் கேதுவின் நட்சத்திரமான மூலம் நட்சத்திரத்தில் அதிகாலை 03.14 மணிக்கு விருச்சக ராசியில் இருந்து தனுசு ராசிக்கு பெயர்ச்சி அடைகிறார்.

மங்களகரமான விகாரி வருடம் திருக்கணித பஞ்சாங்கத்தின் அடிப்படையில் ஐப்பசி மாதம் 18ஆம் (04.11.2019) தேதியன்று பின்னிரவு இயற்கை சுபரான குருதேவர் நவமி திதியில் கேதுவின் நட்சத்திரமான மூலம் நட்சத்திரத்தில் விடியற்காலை 05.17 மணிக்கு விருச்சக ராசியில் இருந்து தனுசு ராசிக்கு பெயர்ச்சி அடைகிறார்.

சூழ்நிலை எதுவாக இருப்பினும் அதை தனக்கேற்றவாறு மாற்றி அமைத்து கொள்ளும் கடக ராசி அன்பர்களே!!

பொதுப்பலன்கள்:

இதுவரை உங்களது ராசிக்கு நான்காவது ஸ்தானத்தில் இருந்துவந்த குருபகவான் பூர்வ புண்ணிய ஸ்தானமான ஐந்தாமிடத்திற்கு பெயர்கின்றார். இந்த குருப்பெயர்ச்சியில் புதுவிதமான எண்ணங்களும், யோசனைகளும் உண்டாகும். குடும்பத்தின் அடிப்படை வசதிகள் அதிகரிக்கும். சொத்து சம்பந்தமான பிரச்சனைகளுக்கு தீர்வு கிடைக்கும். உடல் ஆரோக்கியத்தில் இருந்த இன்னல்கள் நீங்கி மேன்மை ஏற்படும். சிலருக்கு புத்திர பாக்கியம் கிடைக்கும். கருத்து வேறுபாட்டால் பிரிந்து சென்ற உறவினர்களும், நண்பர்களும் மீண்டும் வந்து பேசுவதற்கான சூழல் அமையும்.

வியாபாரிகளுக்கு :

தொழில் சார்ந்த புதிய முயற்சிகளுக்கு பெரியோர்களின் ஆதரவுகள் மற்றும் ஆலோசனைகள் மாற்றமான சூழலை உருவாக்கும். வியாபாரத்தை விரிவுப்படுத்துவதற்கான வாய்ப்புகள் கைகூடும். புதுவிதமான வியாபார யூக்திகளால் லாபம் பெருகும்.

உத்தியோகஸ்தரர்களுக்கு :

உத்தியோகத்தில் இருப்பவர்களுக்கு எதிர்பார்த்த இடமாற்றமும், பதவி உயர்வும் சாதகமாக அமையும். பணிபுரியும் இடங்களில் கீர்த்தியும், கௌரவமும் அதிகரிக்கும். சக ஊழியர்களுடன் இருந்துவந்த கருத்து வேறுபாடுகள் நீங்கும்.

பெண்களுக்கு :

பெண்கள் வீண்பேச்சுக்களை குறைப்பது நல்லது. குடும்பத்தில் இருப்பவர்களுடன் வாக்குவாதத்தை தவிர்ப்பது நல்லது. கணவன்-மனைவி ஒருவருக்கொருவர் அனுசரித்து செல்வது நன்மையை தரும். பிள்ளைகளின் நலனில் அக்கறை தேவை.

விவசாயிகளுக்கு :

விவசாயிகளுக்கு உழைப்பிற்கேற்ற வருமானமும், அங்கீகாரமும் கிடைக்கும். புதிய சொத்து வாங்கும் எண்ணம் மேம்படும். முக்கிய பதவிகளில் இருப்பவர்களுக்கு ஆதரவுகள் பெருகும். வழக்குகளில் நல்ல செய்திகள் கிடைக்கும்.

கலைஞர்களுக்கு :

கலைத்துறையினருக்கு மனதில் புத்துணர்ச்சி உண்டாகும். புதிய நபர்களால் அனுகூலமான சூழல் ஏற்படும். உங்களின் மீதான அவப்பெயர்கள் நீங்கும். புதுவிதமான கற்பனை எண்ணங்களால் அனைவராலும் பாராட்டப்படுவீர்கள்.

மாணவர்களுக்கு :

எண்ணங்களை ஒருமுகப்படுத்தினால் அதிக மதிப்பெண்களை பெறுவீர்கள். விளையாட்டு, கலை, இலக்கியப் போட்டிகளில் பரிசும், பாராட்டும் பெறுவீர்கள். படிப்பிற்கு ஏற்ப நல்ல வேலைவாய்ப்புகள் அமையும்.

அரசியல்வாதிகளுக்கு :

அரசியல் துறையில் இருப்பவர்கள் வாக்குவாதத்தை தவிர்ப்பது நல்லது. உயர்மட்ட அதிகாரிகளால் பாராட்டப்படுவீர்கள். கட்சி தொடர்பான பயணம் மேற்கொள்வதற்கான சூழல் உண்டாகும். மற்றவர்களுக்கு கொடுத்த வாக்குறுதிகளை நிறைவேற்றுவதற்கான வாய்ப்புகள் ஏற்படும்.

பரிகாரம் :

புதன்கிழமைதோறும் துளசி இலைகளால் பெருமாளையும், லட்சுமி தேவியையும் வழிபட்டு வரவும். மேலும், ஸ்ரீவிஷ்ணு சகஸ்ரநாமம் பாராயணம் செய்வதால் இன்னல்கள் நீங்கி நன்மை ஏற்படும்.