தனுசு ராசி :
இதுவரை உங்களின் ராசிக்கு விரய ஸ்தானத்தில் சஞ்சரித்து வந்த குருபகவான் இனி உங்கள் ராசியிலேயே ஆட்சி பெறுகிறார். ஏழரை சனியில் கடுமையான பாதிப்புகள் குறையும். குழப்பமான நிலையில் இருந்து தெளிந்து, வெற்றிக்கொடியை நிலைநாட்ட போகிறார்கள்.
இயற்கை சுபரான குருதேவர் தான் நின்ற இடத்தில் இருந்து பூர்வீக களத்திர மற்றும் பாக்கிய ஸ்தானத்தையும் பார்க்கின்றார். புத்திக்கூர்மை வெளிப்படுத்துவதற்கான வாய்ப்புகள் உண்டாகும். குருவின் ஏழாம் பார்வை ஏழாம் பாவத்தை பார்ப்பதால் நண்பர்கள் மற்றும் கூட்டுத்தொழிலில் இருந்துவந்த சங்கடங்கள் மாறும். பகையான நண்பர்கள் விரும்பி வந்து இணைவார்கள். கணவன், மனைவி ஒற்றுமை மகிழ்ச்சிகரமாக அமையும்.
உத்தியோகஸ்தரர்களுக்கு :
பணிபுரியும் இடத்தில் செல்வாக்கு மேம்படும். உத்தியோகத்தில் உயர் பதவிக்காக முயற்சி செய்பவர்களுக்கு இந்த குருப்பெயர்ச்சிக்கு பின்னர் நல்ல இடத்தில் வேலைவாய்ப்பு அமையும். அலுவலக பணிகளில் உங்களின் திறமைகள் பளிச்சிடும் காலமாகும். உத்தியோகம் தொடர்பான பயிற்சிக்காக வெளியூர் மற்றும் வெளிநாடு சென்று மகிழ்வீர்கள்.
விவசாயிகளுக்கு :
நீர் பாசனத்தின் நிலை தேவைக்கேற்ப சிறப்பாக அமையும். வயல்களில் புதிய நுட்ப கருவிகளின் மூலம் அமோகமான விளைச்சலைக் காண்பீர்கள். மனை சார்ந்த கடன்கள் பெறுவதற்கான வாய்ப்புகள் உண்டாகும். பூர்வீகத்தில் இதுவரை இருந்துவந்த பிரச்சனைகள் விலகி சுமூகமான சூழல் ஏற்படும்.
பெண்களுக்கு :
இதுவரை திருமணம் கைகூடாத பெண்களுக்கு குருப்பெயர்ச்சிக்கு பின்னர் நல்ல இடத்தில் விவாகம் அமையும். உத்தியோகத்தில் உள்ள பெண்களுக்கு தங்களின் திறமைக்கு ஏற்ற பதவி உயர்வு கைகூடும். தந்தைவழி உறவினர்களின் மூலம் ஏற்பட்ட சிறு சிறு சஞ்சலங்கள் மாறி சந்தோஷம் உண்டாகும்.
மாணவர்களுக்கு :
அடிப்படை மற்றும் உயர்கல்வி பயிலும் மாணவர்கள் சிறப்பான முன்னேற்றத்தை காண்பார்கள். போட்டி பந்தயங்களில் கலந்து கொண்டு வெற்றி வாகை சூடுவார்கள். விரும்பிய இடங்களில் உயர்கல்வி பயிலும் வாய்ப்புகள் அமையும். ஆராய்ச்சியில் ஈடுபடும் மாணவர்களுக்கு புதிய கண்டுபிடிப்பினால் சாதனை பெறுவார்கள்.
அரசியல்வாதிகளுக்கு :
தலைமை அதிகாரிகளிடம் நெருக்கமான சூழல் ஏற்படும். தொண்டர்கள் மத்தியில் உங்களின் செல்வாக்கு மேம்படும். புத்திக்கூர்மையுடன் செயல்பட்டு பல சாதனைகளை படைக்கப் போகிறீர்கள். வஞ்சக எண்ணத்துடன் நட்பு கொண்டவர்களின் நிஜ முகம் உங்களுக்கு தெரியப்போகிறது.
கலைஞர்களுக்கு :
புதுவிதமான செயல்பாடுகள் மற்றும் சிந்தனைகள் மேம்படும். கலை சமூகத்தில் மேலதிகாரிகளின் ஆதரவு சிறப்பான பலனை கொடுக்கும். மூத்த சகோதரர்களின் ஒத்துழைப்பு மேலோங்கும். பொறுமையாக இருந்து முயற்சியை துரிதப்படுத்துவதனால் பல வெற்றிகள் கிடைக்கப் போகிறது.
வியாபாரிகளுக்கு :
தந்தையின் தொழிலை தன் தொழிலாக மேற்கொண்டவர்களுக்கு சிறப்பான வளர்ச்சி கிடைக்கும். கூட்டுத்தொழில் செய்பவர்கள் தங்களது தொழிலில் புதிய யுக்தியை கையாளுவதன் மூலம் அமோகமான வெற்றி அடைவீர்கள். மென்பொருள் சார்ந்த வியாபாரத்தில் லாபகரமான சூழல் உண்டாகும்.
வழிபாடு :
வளர்பிறை மற்றும் தேய்பிறை நாட்களில் வரும் பிரதோஷம் அன்று சிவபெருமானை வழிபட்டு சுண்டலை நைவேத்தியமாக வைத்து கோவிலுக்கு வரும் பக்தர்களுக்கு கொடுப்பதன் மூலம் நன்மை உண்டாகும்.
