நம்மில் பலரும் வாங்க ஆசையாகவும், தற்போதைய நெருக்கடி பொருளாதார தேவையை நிறைவேற்ற மிக முக்கிய பக்கபலமாக இருப்பது நாம் முன்பு சேமித்து வைத்த தங்கமே.
தங்கம் வெறுமனே ஒரு ஆபரணமாக, ஒரு உலோகமாக, ஒரு பொருளாக மட்டும் நாமும், நம் முன்னோர்களும் பார்த்தது கிடையாது.
அது ஐஸ்வர்யத்தை அள்ளித்தரக்கூடிய மகாலட்சுமியாக தான் பார்த்து வருகிறோம்.
இன்றும் உலகளவில் பணத்தின் மதிப்பு மாறலாம், அதன் மதிப்பு குறைந்திருக்கலாம். ஆனால் ஒவ்வொரு கிராம் தங்கமும் அதன் மதிப்பு என்றும் குறையவில்லை.
பணத்தின் மதிப்பை விட தற்போது பல மடங்கு உயர்ந்துள்ள ஒரு பொருளாக தங்கம் மட்டுமே இன்றும் உள்ளது.
நம் முன்னோர்களாக இருந்தாலும் சரி, தற்போது உள்ள நவீன காலமாக இருந்தாலும் சரி நம் சேமிப்பில் நல்ல லாபம் தரக்கூடியதாக இருக்கிறது தங்கம்.
இப்படிப்பட்ட மதிப்பு மிக்க, நம் தேவைக்கு கை கொடுக்கக் கூடிய தங்கம் வாங்க சிறந்த நேரம் எது, எப்போது வாங்கினால் தங்கம் விருத்தி ஆகும் என்பதை பார்ப்போம்
- உங்கள் லக்கினத்தில் குரு இருக்கும் போது தங்கம் வாங்கினால் அது பல மடங்கு விருத்தியாகும்.
- நீங்கள் தங்கம் வாங்க விரும்பும் நாளில் லக்கினத்தில் குரு இருந்தாலோ அல்லது கோட்சாரத்தில் குரு உங்களின் ஜென்ம லக்கினத்தில் இருக்கும் பட்சத்தில் தங்க நகையை தாராளமாக வாங்கிக்கொள்ளலாம்.
- ஒரு நாளில் வரும் குரு ஹோரையில் தங்கம் வாங்குவது சிறந்தது.
- அதாவது குருவிற்கு ஏழாம் இடத்தில் சந்திரம் இருக்கும் போது தங்கம் வாங்கலாம். அதிலும் குறிப்பாக வளர்பிறை காலத்தில் குரு சந்திர யோகம் இருக்கும் நேரத்தில் வரக்கூடிய குரு ஹோரையில் நாம் தங்கம் வாங்கும் போது அது பல மடங்கு பெருகும்.
- வர்கோத்தமம் ஆகும் காலங்களில் தாராளமாக தங்கம் வாங்கிக்கொள்ளலாம்.
- ஒவ்வொரு மாதத்தில் வரக்கூடிய அஸ்தம் நட்சத்திர நாளில் குரு ஹோரை வரக் கூடிய நேரத்தில் நாம் தங்கம் வாங்க மிகச்சிறந்த நாளாகும்.
- அதுவும் அஸ்தம் நட்சத்திரமும், வியாழக் கிழமையும் சேர்ந்து வரும் போது அப்போது தங்கம் வாங்கக் கூடிய சிறப்பான நாளாக அமைகிறது.
- கோசாரத்தில் குரு, சூரியன், சந்திரன் ஒன்றுடன் ஒன்று தொடர்பு கொள்ளும் பலமான நேரத்தில் தங்கம் வாங்க உன்னதமான நாளாகும்.
- உங்களின் பொருளாதாரம், ஐஸ்வர்யம் உயர வாங்கக் கூடிய தங்கம் நீங்கள் உழைத்து சேமித்த பணத்தில் வாங்க வேண்டும்.
- எக்காரணத்தைக் கொண்டும் தங்கம் வாங்க கடன் வாங்க கூடாது.
