கற்றாழையை மேற்பூச்சாக பூசுவதை விட மருந்தாக சாப்பிடும் போது சரும பிரச்சனைகள், வயிறு சம்பந்தப்பட்ட நோய்கள், ஒவ்வாமை மற்றும் செரிமான கோளாறு போன்ற பல பிரச்சனைகளுக்கு தீர்வாக அமைகிறது.
அனைவரும் விரும்பும் வகையில் சுவையான கற்றாழை ஸ்வீட் எவ்வாறு தயாரிக்கலாம் என்பதை இங்கு காண்போம்.
தேவையான பொருட்கள்
தோல் நீக்கி அலசப்பட்ட கற்றாழை ஜெல் – 4 தேக்கரண்டி
பால் – 1 லிட்டர்
சர்க்கரை – 5 தேக்கரண்டி
நெய் – 3 தேக்கரண்டி
பாலில் இருந்து புதிதாக தயாரிக்கப்பட்ட கிரீம் – 4 தேக்கரண்டி
ஏலக்காய் – 4
பாதாம், பிஸ்தா (பொடித்தது) – 2 தேக்கரண்டி
செய்முறை
ஒரு பாத்திரத்தில் சர்க்கரையை பொன்னிறமாக மாறும் வரை பாகு பதத்தில் காய்ச்சி கொள்ளவும்.
மற்றொரு அடி கனமான பாத்திரத்தில் 1 லிட்டர் பாலை அரை லிட்டர் ஆகும் வரை மிதமான தீயில் நன்றாக காய்ச்சவும். பின்பு அதில் கற்றாழையை போட்டு 10 நிமிடங்கள் கிளறவும்.
கலவை கிரீம் பதத்திற்கு வரும் வரை கிளறிய பின்பு அதனுடன் பாலில் இருந்து புதிதாக தயாரிக்கப்பட்ட கிரீம் சேர்க்க வேண்டும். இந்த நேரத்தில் பால் லேசாக பொன்னிறமாக மாற தொடங்கும்
அதில் சர்க்கரை பாகு மற்றும் ஏலக்காய் தூளை சேர்த்து கலக்கவும். பின்பு கலவையை இறக்கி ஆற வைக்கவும்.
ஒரு அகன்ற பாத்திரத்தில் உருக்கப்பட்ட நெய் 1 தேக்கரண்டி ஊற்றி பாத்திரம் முழுவதும் பரவ விடவும். அதில் ஆறவைத்த கலவையை கொட்டி சமமாக நிரப்பவும்.
பிறகு விருப்பமான வடிவங்களில் வெட்டி கொள்ளவும்.
வெட்டிய துண்டுகளின் மீது மீதம் இருக்கும் நெய்யை சமமாக ஊற்றி பொடிக்கப்பட்ட பிஸ்தா மற்றும் பாதாமமை தூவவும்.
அவற்றை குளிர்சாதனப்பெட்டியில் ஒரு மணி நேரம் வைத்து எடுக்கவும்.
இப்போது சுவையான கற்றாழை ஸ்வீட் தயார்.
