மாணவர்களின் போராட்டம் காரணமாக நாட்டை விட்டு தப்பிச் சென்ற பங்களாதேஷ் பிரதமர் ஷேக் ஹசீனா லண்டன் செல்லவுள்ளதாக தகவல்கள் தெரிவிக்கின்றன.
முன்னதாக இராணுவ உலங்கு வானூர்தியில் தப்பிச் சென்ற அவர் இந்தியாவின் அகர்தலாவை அடைந்துள்ளதாக ஊடகங்கள் தெரிவித்தன. இவர் அங்கிருந்து லண்டன் செல்லவுள்ளதாக தெரிவிக்கப்படுகிறது.
இட ஒதுக்கீட்டால் வெடித்த போராட்டம்
பங்களாதேசில் சுதந்திர போராட்ட தியாகிகளின் வாரிசுகளுக்கு வழங்கப்படும் 30 சதவீத இட ஒதுக்கீட்டால் ஏற்கனவே கலவரம் வெடித்த நிலையில் அந்நாட்டு உச்சநீதிமன்றம் அந்த இடஒதுக்கீடு இரத்து செய்யப்படும் என்று அறிவித்ததைத் தொடர்ந்து கலவரம் நின்றது.
இதேவேளை நேற்று(04) பிரதமர் ஷேக் ஹசீனா இடஒதுக்கீடு தொடர்பாக பேச்சுவார்த்தை நடத்த அழைத்ததால் மீண்டும் மாணவர்கள் அமைப்பினர் போராட்டத்தில் ஈடுபட்டனர்.
பேச்சுக்கு அழைத்த ஷேக் ஹசீனா
இவர்களுக்கு எதிர்ப்பு தெரிவித்து ஆளும் கட்சியினரும் போராட்டத்தில் ஈடுபட்ட நிலையில் இருதரப்பினருக்கும் இடையே கலவரம் ஏற்பட்டது.
இதில் 100க்கும் மேற்பட்டோர் உயிரிழந்தனர். போராட்டக்காரர்கள் பிரதமர் பதவியை இராஜினாமா செய்யும் வரை போராட்டத்தை நிறுத்த மாட்டோம் என்று அறிவித்தமை குறிப்பிடத்தக்கது.
