முதல் மனைவியை விட்டு ஓடிச் சென்றவர், இரண்டாவது திருமணம் செய்து கொண்டமை பேஸ்புக் மூலம் தெரிய வந்ததால் பொலிஸாரிடம் சிக்கியுள்ளார்.
தமிழகத்தின் பென்னாகரம் நெக்குந்தியை சேர்ந்தவர் பாலச்சந்திரன் (31). தர்மபுரியிலுள்ள தனியார் கல்லூரியில் உதவி பேராசிரியராக பணி புரிந்தார்.
மூன்று ஆண்டுக்கு முன், அதே பகுதியைச் சேர்ந்த அனு (27) என்பவரை காதலித்து திருமணம் செய்தார்.
இத் தம்பதிக்கு ஆண் குழந்தையும் பிறந்தது. இந்த நிலையில் இருவருக்கும் இடையேயான வாழ்க்கையில் பிரச்சினை ஏற்பட்டது. பாலச்சந்திரன் சொல்லாமல் கொள்ளாமல் மனைவியை விட்டு பிரிந்து சென்றுள்ளார்.
கணவர் திடீரென மாயமானதால் அதிர்ச்சியடைந்த அனு அவரைத் தேடி வந்தார். எந்தத் தகவலும் கிடைக்காமல் கவலைக்குள்ளானார். இந்நிலையில், அனுவின் பேஸ்புக் முகவரிக்கு ஒரு புகைப்படம் வந்தது.
அதில் பாலச்சந்திரன், வேறொரு குழந்தையுடன் இருப்பது கண்டு அதிர்ச்சியடைந்தார். இதையடுத்து தனக்கு தெரியாமல் தன்னுடைய கணவன் இரண்டாவது திருமணம் செய்து கொண்டதாக, பென்னாகரம் பொலிஸ் நிலையத்தில் முறைப்பாடு செய்துள்ளார்.
அதன்பேரில் பொலிஸார் விசாரணை நடத்தினர். அப்போது தான் பல உண்மைகள் வெளிவந்தன. பாலச்சந்திரன் அரியலூர் மாவட்டம் ஜெயங்கொண்டத்திலுள்ள தனியார் கல்லூரியில் வேலை பார்த்து வருகிறார்.
பேஸ்புக்கில் வந்த புகைப்படத்தில் இருப்பது அவரது குழந்தைதான். பென்னாகரம் பொலிஸார், ஜெயங்கொண்டம் சென்று பாலச்சந்திரனை கைது செய்து நீதிமன்றத்தில் ஆஜர்படுத்தி சிறையில் அடைத்தனர்.
முதல் மனைவியை பிரிந்து சென்ற பாலச்சந்திரன், ஜெயங்கொண்டத்திலுள்ள தனியார் கல்லூரியில் வேலைக்கு சேர்ந்தார். அப்போது தன்னுடன் வேலை செய்யும் பேராசிரியை சுபாஷினி (25) என்பவருடன் அவருக்கு காதல் ஏற்பட்டது.
அவரிடம் இன்னும் திருமணமாகவில்லை என கூறி ஏமாற்றி இரண்டாவது திருமணம் செய்துள்ளார். அவர்களுக்கு ஒரு ஆண் குழந்தை பிறந்தது. அக் குழந்தை க்கு தற்போது ஒரு வயதாகிறது.
அந்த குழந்தையுடன் தான் எடுத்துக்கொண்ட புகைப்படத்தைத் தான் பேஸ்புக்கில் பதிவேற்றியுள்ளார். மனைவியைப் பிரிந்து சென்ற பாலச்சந்திரன் போலியான பெயரில் பேஸ்புக்கில் ஒரு கணக்கைத் தொடங்கினார்.
அதேபோல அனுவும் வேறொரு பெயரில் பேஸ்புக்கில் இருந்தார். இருவரும் நட்பாகியுள்ளனர். பழக்கம் ஏற்பட்டது. இருவரும் நல்ல நட்புடன் பழகி வந்தனர்.
இந்தநிலையில் அனுவின் பேஸ்புக்குக்கு தனது இரண்டாவது மனைவிக்குப் பிறந்த குழந்தையுடன் எடுத்துக் கொண்ட புகைப்படத்தை அனுப்பி தானாகப் போய் சிக்கிக் கொண்டுள்ளார்.
