டிசம்பர் 26. இந்த நாளை எவராலும் அவ்வளவு எளிதில் மறக்க முடியாது. கடந்த 2004ஆம் ஆண்டு டிசம்பர் 26ஆம் திகதி, உலகையே நிலைக்குலையச் செய்த சுனாமியின் கோரத்தாண்டவம் அரங்கேறிய நாள்.
இன்றை தினம் சுனாமி நினைவுகளை மீட்டும் பல்வேறு நினைவஞ்சலி நிகழ்வுகள் நாடளாவிய ரீதியில் இடம்பெற்றுவருகின்றன.
இந்த நிலையில் யாழ்.வடமராட்சி கிழக்கு உடுத்துறை சுனாமி நினைவிடத்தில் சுனாமி நினைவுநாள் இன்றைய தினம் அனுட்டிக்கப்பட்டுள்ளது.
கடந்த 2004ஆம் ஆண்டு சுனாமி பேரலையினால் உயிரிழந்த மக்களின் 12ஆம் ஆண்டு நினைவு நாளே இன்று அனுட்டிக்கப்பட்டது.
பல்லாயிரக்கணக்கான மக்கள் மற்றும் அரசியல் தலைவர்கள் கலந்து கொண்டு அஞ்சலிகளை செலுத்தியுள்ளனர்.
சுனாமி பேரலையினால் உயிரிழந்த உறவுகளின் 12ஆவது ஆண்டின் நினைவாக இன்றைய தினம் யாழ்.மாவட்ட செயலகத்தில் நினைவு தினம் அனுஷ்டிக்கப்பட்டது.
யாழ்.மாவட்ட செயலகத்தில் மாவட்ட அரசாங்க அதிபர் நாகலிங்கம் வேதநாயகன் இன்று காலை 9.15 மணியளவில் தேசிய கொடியினை ஏற்றியதுடன், உயிரிழந்த உறவுகளுக்கு இரண்டு நிமிட அஞ்சலியும் செலுத்தினார்கள்.
அதனைத் தொடர்ந்து, யாழ்.மாவட்ட செயலகத்தில் தேசிய பாதுகாப்பு தின நிகழ்வுகளும் இடம்பெற்றன.
அந்த நிகழ்வின் போது, உயிரிழந்தவர்களின் ஆத்ம ஈடேற்றத்திற்காக மத குருமார்களின் ஆசியுரைகளும் இடம்பெற்றது.
எதிர்காலத்தில் அனர்த்தங்கள் ஏற்படாமல் தடுப்பதற்கு அனைத்து மக்களும் அனர்த்த முன் ஆயத்த பணிகளை மேற்கொள்ள வேண்டுமென்றும், அனர்த்தங்களின் போது, விழிப்புணர்வுடன் செயற்பட வேண்டுமென்றும் அனர்த்த முகாமைத்துவ மத்திய நிலையத்தினரால் உத்தியோகத்தர்களுக்கு அறிவுறுத்தல்களும் வழங்கப்பட்டன.
இந்த நிகழ்வில், மதகுருமார்கள் மற்றும், அரச உத்தியோகத்தர்கள் எனப்பலரும் கலந்து கொண்டனர்.
