சென்னையில் அரசு வகுத்துள்ள விதிமுறைகளின் கீழ் சினிமா தியேட்டர்களில் கட்டணம் வசூலிப்பதை கண்காணிப்பதற்காக வணிக வரித்துறை, வருவாய்த்துறை மற்றும் போலீஸ் துறையைச் சேர்ந்த அதிகாரிகள் கொண்ட கண்காணிப்புக் குழு அமைக்கப்பட்டுள்ளது. ஐகோர்ட்டு உத்தரவின்படி இந்த கண்காணிப்புக்குழு அமைக்கப்பட்டுள்ளது.
இந்த கண்காணிப்புக்குழுவினர் தியேட்டர்களில் உள்ள அடிப்படை வசதிகள் மற்றும் கட்டணம் வசூலிப்பதை நேரடியாக சென்று பார்வையிடுவார்கள். கடந்த பொங்கல் பண்டிகையையொட்டி சென்னை நகரில் உள்ள சினிமா தியேட்டர்களில் நாள் ஒன்றுக்கு 5 காட்சிகள் வரை நடத்த அரசு அனுமதி வழங்கி இருந்தது. கண்காணிப்புக்குழு அதிகாரிகள் சென்னையில் உள்ள சினிமா தியேட்டர்களில் நேரடியாகச் சென்று திடீர் சோதனை நடத்தினார்கள்.
இந்த சோதனையின்போது அரசு வகுத்துள்ள விதிமுறைகளை மீறி 5 தியேட்டர்களில் அதிக கட்டணம் வசூலித்ததாக கண்டறியப்பட்டுள்ளது. அந்த தியேட்டர்கள் மீது வழக்குப்பதிவு செய்யப்பட்டுள்ளது. அவற்றில், 4 தியேட்டர்கள் வடசென்னை பகுதியில் உள்ளவையாகும். போலீஸ் கமிஷனர் ஜார்ஜ் உத்தரவின் பேரில் மேற்கண்ட நடவடிக்கை எடுக்கப்பட்டுள்ளது. ஒரு தியேட்டரின் மீது 3 வழக்குகள் வரை பதிவு செய்யப்பட்டால் அந்த தியேட்டரின் லைசென்சை ரத்துசெய்ய சிபாரிசு செய்யப்படும் என்று கண்காணிப்புக்குழு அதிகாரிகள் தெரிவித்தனர்.
