நடிகரும் எம்.எல்.ஏ.வுமான கருணாஸ் இன்று காலை போயஸ் கார்டனில் உள்ள ரஜினிகாந்த் வீட்டுக்கு சென்றார். அங்கு ரஜினியை சந்தித்தார். இன்று ரஜினி மனைவி லதாவுக்கு பிறந்த நாள். அவருக்கு வாழ்த்து தெரிவித்தார்.
பின்னர் ரஜினியுடன் சிறிது நேரம் கருணாஸ் பேசிக்கொண்டிருந்தார். ரஜினி வீட்டில் இருந்து வெளியே வந்த அவரை பத்திரிகை, தொலைக்காட்சி நிருபர்கள் சூழ்ந்து கொண்டனர்.
அப்போது கருணாஸ் கூறும்போது, ரஜினி சார் மீது எப்போதும் எனக்கு தனிப்பட்ட முறையில் மரியாதை உண்டு. அவரது ‘பாட்ஷா’ படம் நாளை டிஜிட்டல் முறையில் வெளியாகிறது. இதற்கு வாழ்த்து சொல்வதற்காக அவரை சந்தித்தேன்.
எனக்கு எம்.எல்.ஏ சீட் கிடைத்த போது ரஜினி சார் எனக்கு போன் செய்து வாழ்த்தினார். இப்போது வெற்றி பெற்ற பிறகு அந்த மகிழ்ச்சியை தெரிவிப்பதற்காகவும் அவரை சந்தித்தேன். இது மரியாதை நிமித்தமான சந்திப்பு. அரசியல் பற்றி அவரிடம் எதுவும் பேசவில்லை.
டுவிட்டரில் கமல்ஹாசன் தெரிவிக்கும் கருத்து குறித்து நான் எதுவும் சொல்ல விரும்பவில்லை. என்னை மக்கள் ஏற்றுக்கொண்டிருக்கிறார்கள். சிலர் வேண்டும் என்றே எதிர்ப்பு தெரிவிக்கிறார்கள். நான் மக்களுக்கு தொடர்ந்து சேவை செய்வேன்.
இவ்வாறு கருணாஸ் கூறினார்.
