ஒருநாள் கிரிக்கெட்டில் அதிக ஓட்டங்களை குவித்த இந்திய கிரிக்கெட் வீரர்களின் பட்டியலில் டோனி 4வது இடத்துக்கு முன்னேறியுள்ளார்.
இந்திய கிரிக்கெட் அணியின் தலைவராக மகேந்திர சிங் டோனி இருந்த போது இந்திய அணி உலகக் கிண்ண கிரிக்கெட், மினி உலகக் கிண்ணம் (சாம்பியன்ஸ் டிராபி), டி20 உலகக் கிண்ணம் ஆகிய 3 உலக கிண்ணங்களை வென்றுள்ளது.
பேட்டிங் செய்வதில் கில்லாடியான டோனி நேற்று மேற்கிந்திய தீவுகள் அணிக்கு எதிரான 3வது ஒருநாள் போட்டியில் 78 ஓட்டங்கள் குவித்தார்.
டோனி 15 ஓட்டங்கள் எடுத்த போது ஒருநாள் போட்டிகளில் அதிக ஓட்டங்கள் குவித்த இந்திய வீரர்கள் பட்டியலில் நான்காவது இடத்துக்கு முன்னேறியுள்ளார்.
இந்திய அணியின் முன்னாள் தலைவர் அசாருதீனை பின்னுக்கு தள்ளி இந்த மைல் கல்லை எட்டியுள்ள டோனி தற்போது வரை மொத்தம் 9442 ஓட்டங்களை குவித்துள்ளார்.
இந்த பட்டியலில் சச்சின் டெண்டுல்கர் 18426 ஓட்டங்களுடன் முதலிடத்திலும், கங்குலி 11363 ஓட்டங்களுடன் இரண்டாவது இடத்திலும், டிராவிட் 10889 ஓட்டங்களுடன் மூன்றாவது இடத்திலும் உள்ளனர்.
அசாருதீன் 9378 ஓட்டங்களுடன் ஐந்தாவது இடத்தில் உள்ளார்.
