பாராளுமன்ற உறுப்பினர் விமல் வீரவன்சவின் ஹோகந்தர பிரதேசத்தில் உள்ள வீட்டில் கடந்த 26ம் திகதியன்று இளைஞர் ஒருவர் உயிரிழந்திருந்தார்.
சம்பவம் தொடர்பில் தேடிப்பார்த்தபோது, உயிரிழந்த நபர் பாராளுமன்ற உறுப்பினர் விமல் வீரவன்சவின் மகனான விபுதி விஷ்வஜித் வீரவன்சவுடன் நெருங்கிய தொடர்புடைய நண்பர் என்பது தெரியவந்தது.

விமல் வீரவன்சவின் வீட்டிற்கு அடிக்கடி வந்து போகும் குறித்த இளைஞர் கடந்த 25ம் திகதியும் அங்கு சென்றுள்ளதுடன், அன்றிரவு அங்கேயே தங்கியிருந்துள்ளார்.
எவ்வாறாயினும் மறுநாள் கண்விழிக்காத குறித்த இளைஞனை, வீரவன்சவின் மனைவி சஷி வீரவன்ச, ஜயவர்தனபுர வைத்தியசாலையில் அனுமதிக்க முயற்சித்த போதும், ஏற்கனவே அந்த இளைஞர் உயிரிழந்திருந்தார்.

இந்நிலையில் உயிரிழந்த இளைஞன் தொடர்பில் பிரேத பரிசோதனை மேற்கொண்டு அறிக்கையை நீதிமன்றில் சமர்பிக்குமாறு கடுவலை நீதவான் நீதிமன்ற நீதிபதி உத்தரவிட்டிருந்தார்.

ஹோகந்தர தெற்கு பிரதேசத்தைச் சேர்ந்த திசாநாயக்க முதியன்சலாகே லஹிரு ஜனித் திசாநாயக்க என்ற 24 வயதுடைய இளைஞர் ஒருவரே இவ்வாறு உயிரிழந்திருந்தார்.

இந்த மரணம் தொடர்பில் தனக்கும் தனது மகனுக்கும் எதிராக சில இணையத்தளங்கள் மற்றும் சமூகவலைத்தளங்கள் ஊடாக பொய்ப்பிரச்சாரம் செய்யப்படுவதாக அண்மையில் விமல் வீரவன்ச கூறியிருந்தார்.

அத்துடன் மரணம் தொடர்பில் சில இணையத்தளங்கள் வெளியிடுகின்ற செய்திகளினால் தனது சிறுவர் உரிமை மீறப்பட்டுள்ளதாக கூறி விமல் வீரவன்சவின் மகளான விமாஷா வி்ஷ்வாதரி தாயுடன் சென்று சிறுவர் பாதுகாப்பு பிரிவில் முறைப்பாடு செய்திருந்தார்.

இந்நிலையில் விசாரணைகள் பெரும்பாலும் வீரவன்சவின் இன்னொரு முகத்தினை வெளி உலகத்திற்கு காட்டலாம் என அரசியல் விமர்சகர்கள் கருத்து தெரிவித்து வருகின்றமை குறிப்பிடத்தக்கது.

இன்று ஜூம்மா தொழுகையின் பின்னர் முஸ்லிம் தனியார் சட்டத்தில் மாற்றங்கள் கொண்டு வரப்படுவதை எதிர்த்து ஆர்ப்பாட்டம் ஒன்று மேற்கொள்ளப்படுகின்றது.

சர்வதேச அழுத்தங்களினால் முஸ்லிம் தனியார் சட்ட திருத்தத்திற்கான புதிய குழு நியமிக்கப்படுவதற்கு மக்களின் எதிர்ப்பை வெளிப்படுத்தவே இந்த ஆர்ப்பாட்டம் முன்னெடுக்கப்படுகின்றது.

ஆர்ப்பாட்டத்தை இலங்கை தவ்ஹீந் ஜமாத்தினரின் ஏற்பாடு செய்துள்ளனர். மத தலைவர்கள், அதிகளவான பெண்கள் உட்பட பொது மக்கள் பலரும் இந்த ஆர்ப்பாட்டத்தில் கலந்துக்கொண்டதாக செய்திகள் தெரிவிக்கின்றது.

முன்னாள் உயர் நீதிமன்ற நீதியரசர் ஸலீம் மர்ஸுப் தலைமையில் 2009 ஆம் ஆண்டு ஒரு உப குழு நியமிக்கப்பட்டு, அதன் மூலம் முஸ்லிம் தனியார் சட்டத்தில் ஷரீஆவிற்கு பாதகமில்லாத வகையில் தற்கால தேவைகளுக்கு  மாற்றங்கள் செய்யவதற்கு ஏற்பாடுகள் செய்யப்பட்டு, அதன் இறுதி அறிக்கை தற்போது வெளியிடப்படவுள்ளமை குறிப்பிடத்தக்கது.

மகாவலி கங்கைக்கு நீராடச் சென்ற மாணவர்கள் இரண்டு பேர் நீரில் மூழ்கி மரணித்ததாக காவல்துறையினர் தெரிவித்துள்ளனர்.

கண்டி – பொல்கொல்ல நீர்தேக்கத்தில் இந்த சம்பவம் இடம்பெற்றுள்ளது.

இதன்போது நீரில் மூழகிய மற்றும் ஒருவர் மீட்கப்பட்டுள்ளார்.

15, 16, 17, வயதுடைய கட்டுகஸ்தோட்டை பாடசாலை ஒன்றில் கல்வி கற்கும் மூவரே அனர்த்தத்திற்கு முகம் கொடுத்ததாக காவல்துறையினர் தெரிவித்தனர்.

தமிழ் மக்கள் விடயத்தில் ஜனாதிபதி மைத்திரிபால சிறிசேனவின் செயற்பாடுகள் குறித்து பல விமர்சனங்கள் தெரிவிக்கப்பட்டு வந்த வேளையில் தற்போது அதமிழ் மக்கள் குறித்து மைத்திரியின் சில கருத்துக்கள் தமிழ் மக்களை சந்தோஸத்தின் உச்சியில் கொண்டு சென்றுள்ளது.

குறிப்பாக  கடந்த தேர்தலின் போது தமக்கு வாக்களித்த 90வீதமான தமிழ் மக்களின் நம்பிக்கையின் அடிப்படையில் அவர்களின் பிரச்சினையை தீர்க்க வேண்டும். அவர்களின் பிரச்சினையை தீர்ப்பது தமது பொறுப்பு மாத்திரமல்ல என தமது கடமையும் கூட என  ஜனாதிபதி மைத்திரிபால சிறிசேன  குறிப்பிட்டுள்ளார்.

தெ ஹிந்துவுக்கு வழங்கிய செவ்வியில் அவர் இந்தக்கருத்தை வெளியிட்டுள்ளார்.

இவர் இங்கு மேலும் கருத்து தெரிவிக்கையில்…….

அரசாங்கத்தை பொறுத்தவரையில் சிங்களவர்கள், தமிழர்கள் மற்றும் முஸ்லிம்கள் ஏற்றுக்கொள்ளும் வகையிலான தீர்வுக்கு பெருமுயற்சியை மேற்கொள்கிறது.

சர்வதேச போர்க்குற்ற விசாரணையை தாம் ஏற்றுக்கொள்ளப்போவதில்லை என்றுக் குறிப்பிட்டுள்ள ஜனாதிபதி, வெளிநாடுகளின் நீதித்துறை நிபுணர்களின் ஆலோசனைகளை பெற்றுக்கொள்ள முடியும் என்று குறிப்பிட்டுள்ளார்..

ஐக்கிய தேசியக்கட்சியுடன் புரிந்துணர்வுடன் நடந்துக்கொள்வது தொடர்பில் தமக்கு ஸ்ரீலங்கா சுதந்திரக்கட்சிக்குள் அழுத்தங்கள் இல்லை என்றும் மைத்திரிபால தெரிவித்துள்ளார்.

தாம் பதவியேற்ற பின்னர் இதுவரை மேற்கொண்ட செயற்பாடுகள் குறித்து திருப்தி வெளியிட்டுள்ள ஜனாதிபதி, இலங்கைக்கு எதிரான ஐக்கிய நாடுகள் மனித உரிமைகள் பேரவையின் யோசனைகள் மற்றும் நாடு தற்போது எதிர்நோக்கியுள்ள 9000 பில்லியன் கடன்பளு என்பனவற்றை தீர்க்க வேண்டியுள்ளதாக ஜனாதிபதி தெரிவித்துள்ளார்.

எனினும் பதவியை இழந்தவர்கள் தமது நடவடிக்கைகளை, குழப்ப முனைவதாக குற்றம் சுமத்தியுள்ள ஜனாதிபதி, 50 வருட அரசியல் அனுபவத்தை கொண்டுள்ளதன் அடிப்படையில் தாம் எந்தவொரு சலாலையும் சமாளித்து வெற்றிப்பெற முடியும் என்ற நம்பிக்கை இருப்பதாக குறிப்பிட்டுள்ளார்.

ஜனாதிபதியான பின்னர் 11 தடவைகள் யாழ்ப்பாணத்துக்கு தாம் விஜயம் செய்துள்ளதாக குறிப்பிட்டுள்ள அவர், முன்னர் இருந்த ஜனாதிபதிகள் எவரும் அவ்வாறு செல்லவில்லை என்று சுட்டிக்காட்டியுள்ளார்.

வடக்கை பொறுத்த வரையில் 90 வீதமான தமிழ் மக்கள் தமக்கு வாக்களித்துள்ளார்கள். எனவே அவர்களின் பிரச்சினையை தீர்க்க வேண்டியது தமது கடமையாகும்.

தாம் பதவிக்கு வந்தபோது நாட்டின் சட்டம் பலவீனமாக இருந்தது. எனவேதான் பிரதம நீதியரசராக சிறுபான்மையினத்தை சேர்ந்த ஒருவரை நியமித்ததாக குறிப்பிட்ட ஜனாதிபதி, சிறுபான்மையினர் மத்தியில் இலங்கையின் நீதிமுறை தொடர்பாக நம்பிக்கையை கட்டியெழுப்புவது இதன் நோக்காகும்.

சமஸ்டி என்ற சொல் தென்னிலங்கை மக்கள் மத்தியில் பாதகமானதாக பார்க்கப்படுகிறது. வடக்கு மக்களை பொறுத்தவரை ஒற்றையாட்சி என்ற சொல் அபாயமானதாக கருதப்படுகிறது.

எனவே அனைவரும் ஏற்றுக்கொள்ளக்கூடிய பொது உடன்பாடு ஒன்றுக்கு வரவேண்டிய அவசியம் ஏற்பட்டுள்ளது.

இந்தநிலையில் தேவையற்ற வாதங்களை விடுத்து விரைவில் தீர்வு ஒன்றை ஏற்படுத்த முயல்வதாக ஜனாதிபதி தெரிவித்துள்ளார்.

மஹிந்த ராஜபக்சவின் புதிய கட்சி தொடர்பில் கருத்து வெளியிட்ட அவர், புதிய ஒரு அரசியல் சக்தி உருவாவதற்கான சாத்தியங்கள் இல்லை என்று மைத்திரிபால கூறியுள்ளார்.

இந்திய – இலங்கை எட்கா உடன்படிக்கை தொடர்பில் கருத்துரைத்துள்ள அவர், எந்த நாட்டுக்கும் பாதகம் ஏற்படாத வகையில் அது செயற்படுத்தப்படும் என்று தெரிவித்துள்ளார்.

இதேவேளை இந்தியாவும் சீனாவும் இலங்கையின் நெருங்கிய நண்பர்கள் என்றும் மைத்திரிபால சிறிசேன குறிப்பிட்டுள்ளார்.